Turkiya Respublikasi savdo vaziri O‘mer Bo’lat 63-Damashq xalqaro yarmarkasi doirasida Suriya iqtisodiyot va sanoat vaziri Nidal ash-Shaar bilan uchrashdi. Uchrashuvda ikki mamlakat o‘rtasidagi savdo hajmini 10 milliard dollarga yetkazish maqsadida amalga oshiriladigan qadamlar muhokama qilindi.
Bolat chorshanba kuni Turkiyaning NSosyal ijtimoiy tarmog‘idagi sahifasida qilgan bayonotida, uchrashuvda, ayniqsa, transport va bojxona darvozalarida savdoni yengillashtirish bo‘yicha hamkorlik imkoniyatlari ko‘rib chiqilganini bildirdi. Shuningdek, Turkiya xususiy sektori Suriyani qayta tiklash jarayonida qanday rol o‘ynashi mumkinligi ham muhokama qilindi.
Ikki vazir aprel oyida o‘tkazilgan Turkiya–Suriya qo‘shma iqtisodiy va savdo komissiyasi yig‘ilishida erishilgan kelishuvlarni amalga oshirish borasidagi qat’iyatlarini yana bir bor tasdiqladi.
Bo’lat keyinchalik Suriya investitsiya agentligining yangi rahbari Ahmad Ravad Ramadan bilan uchrashib, turk kompaniyalarining Suriyadagi sarmoya rejalari va mavjud imkoniyatlarni muhokama qildi.
Uchrashuvda sarmoya muhitini yanada barqaror va oldindan bashorat qilish mumkin bo‘lgan holga keltirish uchun amalga oshirilishi mumkin bo‘lgan qadamlar, shuningdek, Suriyaning Kamune va Saroqib hududlaridagi uyushgan sanoat zonalariga kiritilishi rejalashtirilayotgan sarmoyalar ko‘rib chiqildi.
Bo’lat Ramadanning turk ishbilarmon doiralarini yaqindan tanishi Turkiya va Suriya o‘rtasidagi sarmoyaviy aloqalarni rivojlantirishga muhim hissa qo‘shishini ta’kidladi.
Yig‘ilishda qatnashgan turk ishbilarmonlari ham mintaqada ishlab chiqarish va bandlikni oshirishga doir umidlari hamda uzoq muddatli sarmoya rejalarini bayon qildi.
