Tashqi Ishlar vaziri Hakan Fidan yangi yil munosabati bilan yo‘llagan tabrigida, Turkiya 2026 - yili tinchlik, barqarorlik va farovonlik yo‘lida olib borilayotgan sa’y - harakatlarda yetakchilikni davom ettirishi va ko‘p tomonlama diplomatiyani mustahkamlashi hamda insoniy mas’uliyatlarini ado etishini ta’kidladi.
Fidan kecha (31.12.2025) yangi ijtimoiy tarmoq platformasi NSosyal va avval Twitter degan nom bilan tanilgan X tarmog‘ida e’lon qilgan bayonotida, Turkiya o‘tgan yili G‘azo va Ukrainadan tortib Janubiy Kavkaz hamda Afrika Shoxi hududigacha bo‘lgan keng geografiyada ishonchli ishtirokchi va inqirozlarni hal etishda murojaat qilinadigan muhim manzil sifatida alohida o‘rin tutganini bildirdi.
Uning soʻzlariga ko‘ra, Anqara, Prezident Rejep Tayyip Erdoʻgʻan rahbarligida milliy manfaatlarni himoya qilish va Turkiyaning haqli da’volarini qoʻllab - quvvatlashni maqsad qilgan koʻp qirrali, faol, muvozanatli va realistik tashqi siyosat olib bormoqda.
«Milliy manfaatlarimizni himoya qilish, haqli da’volarimizni qo‘llab - quvvatlash va Turkiyaning ta’sirini his ettirish uchun tinimsiz mehnat qildik», — dedi Hakan Fidan. U oʻz so‘zida shuningdek: «2026 - yili ham xuddi shu qat’iyat bilan tinchlik, barqarorlik va farovonlik yo‘lidagi sa’y - harakatlarga yetakchilik qilishda, ko‘p tomonlama diplomatiyaga hissa qo‘shish va insoniy mas’uliyatlarimizni bajarishda davom etamiz» - degan ifodalarga oʻrin berdi.
Tashqi Ishlar vaziri Hakan Fidan shunga qoʻshimcha ravishda mamlakat ichida va xorijda yashayotgan fuqarolarga yangi yil tabriklarini yo‘llab; 2026 - yil Turkiya, turk xalqi va butun insoniyat uchun tinchlik hamda ezgulik olib kelishini tiladi.
