Kanada Tashqi ishlar vazirligi mamlakatning Suriyani terrorni qo‘llab-quvvatlovchi davlatlar ro‘yxatidan chiqarishga qaror qilganini ma’lum qildi.

Kanada hukumati juma kuni e’lon qilgan bayonotida shunday dedi:
“Kanada hukumati keng qamrovli ko‘rib chiqishdan so‘ng Suriyani Davlat Immuniteti to‘g‘risidagi Qonun doirasidagi Terrorni Qo‘llab-Quvvatlovchi Chet Davlatlar Ro‘yxatidan, shuningdek Hay’at Tahrir ash-Shomni (HTSh) Kanada Jinoyat Kodeksi doirasidagi Terroristik Tashkilotlar Ro‘yxatidan chiqardi.”

Vazirlik bu qarorlarning Buyuk Britaniya va AQShning yaqindagi qarorlari bilan mos tushishini, hamda Suriya o‘tish hukumatining barqarorlikni ta’minlash, inklyuziv kelajak qurish va terrorizmga qarshi kurashda global hamkorlar bilan ishlash borasidagi harakatlarini qo‘llab-quvvatlash maqsadida qabul qilinganini ta’kidladi.

Hay’at Tahrir ash-Shom Suriya fuqarolar urushi chog‘ida Bashar Asad rejimi kuchlariga qarshi chiqqan eng qudratli guruhlardan biri edi. Asadning ag‘darilishidan so‘ng Suriya prezidenti bo‘lgan Ahmad Sharo mazkur guruhning yetakchilaridan bo‘lgan.

Kanada tashqi ishlar vaziri Anita Anand, mamlakatning Suriya hukumatining bir yil avval Asad rejimining tugashi ortidan “suriyaliklar boshchiligida tinch siyosiy o‘tish jarayoni” tomon qo‘ygan “ijobiy qadamlarini” mamnuniyat bilan kuzatayotganini bildirdi.

Anand shunday qo‘shimcha qildi:
“Kanada inklyuziv, barqaror va farovon kelajak sari intilayotgan Suriya xalqining yonida qat’iy turishda davom etadi.”