Turkiya Respublikasi Milliy Mudofaa vazirligi Qatarda yuz bergan harbiy vertolyot halokatida jami 7 kishi halok bo‘lganini ma’lum qildi. Vazirlik halok bo‘lganlar orasida 4 nafar Qatar Qurolli kuchlari xodimi, 1 nafar Turkiya Qurolli kuchlari a’zosi va 2 nafar ASELSAN texnik xodimi borligini bildirdi.
Vazirlik bayonotida Turkiya va Qatar o‘rtasidagi harbiy hamkorlik hamda muvofiqlashtirish faoliyatlari amaldagi kelishuvlar va rejalar doirasida uzluksiz davom etayotgani ta’kidlandi.
Bayonotda aytilishicha, Qatar – Turkiya Qo‘shma harbiy kuchlari qo‘mondonligi doirasida o‘quv faoliyatini olib borayotgan Qatar Qurolli kuchlariga tegishli vertolyot shanba kuni (21.03.2026) kechqurun dastlabki ma’lumotlarga ko‘ra texnik nosozlik sabab dengizga qulagan.
Halokatdan so‘ng boshlangan qidiruv - qutqaruv ishlari natijasida vertolyot qoldiqlari va halok bo‘lgan xodimlarning tanalari topilgani bildirildi.
Vazirlik halok bo‘lganlar uchun «shahid» ifodasini qo‘llab, hodisada 4 nafar qatarlik harbiy, 1 nafar turk harbiy xodim va 2 nafar ASELSAN texnik xodimi shahid bo‘lganini ma’lum qildi.
Halokatning aniq sababi Qatar rasmiylari tomonidan olib boriladigan tergov natijasida aniqlanishi bildirildi.
Milliy Mudofaa vazirligi bayonotida halok bo‘lganlarga Allohdan rahmat, ularning oila a’zolariga sabr tilanib; Turkiya Qurolli kuchlari, Qatar Qurolli kuchlari, ASELSAN, turk xalqi va Qatar xalqiga hamdardlik izhor qilindi.
