Markazi AQShda joylashgan va Eron masalalariga ixtisoslashgan Inson huquqlari faollari axborot agentligi (HRANA) bugun (14.01.2026) bergan bayonotida, Erondagi norozilik namoyishlari chog‘ida halok bo‘lganlar soni 2 ming 571 nafarga yetganini ma’lum qildi. Bayonotda, mamlakat rahbariyati, so‘nggi yillarning eng yirik muxolif harakatiga duch kelganini qayd etdi.
HRANA ma’lumotiga ko‘ra 2 ming 403 nafar namoyishchi, hukumat kuchlari bilan bog‘liq 147 kishi, 12 nafar yosh bola ham da namoyishlarda ishtirok etmagan 9 nafar tinch aholi vakilining o‘limi tasdiqlangan.
Eronlik rasmiylardan biri seshanba kuni (13.01.2026) qariyb 2 ming kishi halok bo‘lganini tan oldi. Bu esa ikki haftadan ortiq vaqt avval boshlangan va butun mamlakatda keng tarqalgan norozilik namoyishlari boshlanganidan buyon rasmiylar tomonidan berilgan ilk umumiy raqam hisoblanadi.
Yomonlashib borayotgan iqtisodiy sharoitlar sabab boshlangan namoyishlar so‘nggi uch yil ichida Eron rahbariyati duch kelgan eng jiddiy ichki sinovga aylandi.
Harbiy amaliyot kun tartibida
AQSh Prezidenti Donald Tramp seshanba kuni (13.01.2026) eronliklarni, noroziliklarni davom ettirishga chaqirib, bu chaqiriq «yordam yo‘lida», - ekaniga e’tibor qaratdi.
Jurnalistlar tomonidan aytgan so‘zlari qanday ma’noni anglatishi haqida berilgan savolga esa Tramp: «Buni ularning o‘zlari hal qilishlari kerak», - deb javob berdi va harbiy amaliyot bosimga javob sifatida ko‘rib chiqilayotgan variantlar qatorida ekanini ifoda etdi.
Eron rasmiylari esa AQSh bilan Isroilni beqarorlikni qo‘zg‘atishda ayblab, yuz bergan o‘limlarni xorijiy kuchlar tomonidan yo‘naltirilayotgan «terrorchi unsurlar» faoliyati sifatida izohladi.
