“Hassas, ammo maxfiy bo‘lmagan” deb tavsiflangan hujjat AQSh va boshqa ishtirokchi davlatlarga Gazzani boshqarish bo‘yicha keng vakolatlar beradi.
AQSh rasmiylaridan birining aytishicha, mazkur loyiha kelgusi kunlarda Kengash a’zolari o‘rtasidagi muzokaralarga asos bo‘ladi. Maqsad – qarorni yaqin haftalarda ovozga qo‘yish va 2026-yil yanvariga qadar ilk bo‘linmalarni Gazzaga joylashtirish.
Rasmiyning so‘zlariga ko‘ra, bu kuchlar “tinchlikparvar emas, balki ijrochi kuch” sifatida shakllantiriladi va bir necha davlatlarning askarlari ishtirok etadi. Kuch “Gazzadagi Tinchlik Kengashi” bilan hamkorlikda tuziladi.
Loyihaga ko‘ra, Xalqaro Xavfsizlik Kuchlari (ISF) Gazzaning Isroil va Misr bilan chegaralarini himoya qilish, tinch aholini va gumanitar yo‘laklarni qo‘riqlash, shuningdek yangi Falastin politsiyasini tayyorlash vazifalarini bajaradi.
Shuningdek, loyiha Tinchlik Kengashining kamida 2027-yil oxirigacha faoliyat yuritishini nazarda tutadi.
Hujjatda ISF Gazzaning qurolsizlantirilishi, harbiy va terror infratuzilmasining yo‘q qilinishi hamda davlatdan tashqari qurolli guruhlarning qurollarini doimiy ravishda musodara qilish uchun javobgar bo‘lishi ko‘rsatilgan.
Turkiyadan “vesayet tizimi” ogohlantirishi
Turkiya tashqi ishlar vaziri Hakan Fidan, dushanba kuni bergan bayonotida, mamlakatlarning askar yuborish haqidagi qarorlari kutilayotgan BMT rezolyutsiyasidagi aniqliklarga bog‘liq bo‘lishini bildirdi.
“Ishonchimiz komilki, mamlakatlar BMT Xavfsizlik Kengashidan chiqadigan qarorning mazmuniga qarab qaror qabul qiladi,” dedi Fidan, Istanbulda o‘tgan G‘azza bo‘yicha yig‘ilishdan so‘ng.
Mazkur uchrashuvda Indoneziya, Pokiston, Saudiya Arabistoni, Iordaniya, BAA va Qatar vakillari ishtirok etdi.
Fidan, mamlakatlar vakolat va qonuniylik aniq belgilangan xalqaro kuch tuzilishini istayotganini ta’kidladi. Unga ko‘ra, avvalo umumiy kelishuvga erishish, so‘ngra Kengashning doimiy a’zolari tomonidan veto qilinmasdan tasdiqlanishi zarur.
Turkiya va yig‘ilishda ishtirok etgan olti musulmon davlat, Gazzaning kelajagi falastinliklarning o‘z qo‘lida bo‘lishi va yangi bir “vasiylik tizimi”ning yaratilishidan saqlanish zarurligini bildirdi.
Uch haftalik, biroq AQSh ittifoqchisi Isroil tomonidan bir necha bor buzilgan o‘t ochishni to‘xtatish bitimida markaziy rol o‘ynagan Turkiya, musulmon mamlakatlarning genotsidga uchragan Falastin hududlarini qayta tiklashdagi ta’sirini oshirish uchun faol harakat qilmoqda.
Fidan so‘zlarini quyidagicha yakunladi:
“Bizning prinsipimiz — falastinliklar o‘zini o‘zi boshqarsin, o‘z xavfsizligini ta’minlasin. Xalqaro hamjamiyat esa bu jarayonni diplomatik, institutsional va iqtisodiy jihatdan qo‘llab-quvvatlashi kerak. Hech kim yangi bir vasiylik tizimining paydo bo‘lishini istamaydi.”
