Gonkongning Tai Po tumanida sakkizta binodan tashkil topgan turarjoy majmuasida sodir bo‘lgan yong‘inda halok bo‘lganlar soni 44 nafarga yetar ekan, 279 kishi haligacha bedarak.
South China Morning Post xabariga ko‘ra, yong‘in qurbonlari soni oshishda davom etmoqda.
Yong‘in chorshanba kuni (26.11.2025) tushdan keyin, 1 ming 900 dan ortiq uyga ega bo‘lgan majmuada boshlangan va tashqi tomonida ta’mirlash uchun o‘rnatilgan bambuk platforma orqali tez yoyilgan.
Mahalliy yong‘in xizmati bergan ma'lumotga ko‘ra shu paytgacha 44 kishi halok bo‘lgan va ulardan bir nafari o‘t o‘chiruvchilardan ekani aniqangan.
Shifoxonaga yetkazilgan yaradorlarning 45 nafarining ahvoli og‘ir.
Taxminan 4 ming nafar aholi yashaydigan majmuada olov o‘rab olgan yetti binodan uchtasi nazorat ostiga olingan, qolgan to‘rt binoda esa yong‘in davom etmoqda.
Umumiy hisobda 279 kishi haligacha bedarak yo‘q deb qayd etilgan va 26 ta yong‘in -o‘chiruv brigadasi ishni davom ettirmoqda.
Politsiya ta’mirni amalga oshirgan qurilish kompaniyasining ikki menejeri va bir maslahatchi muhandisni “ehtiyotsizlik oqibatida odam o‘ldirish” gumoni bilan qo‘lga olgan.
Rasmiylarga ko‘ra, ta’mir vaqtida o‘rnatilgan bambuk platforma bilan derazalarni yopgan ko‘pik plastmassa materiallari yong‘inning tez tarqalishiga jiddiy ta’sir ko‘rsatgan.
Bosh komissar Eileen Chung Lai-yee mavzu haqida: “Shirkatdagi mas’ul shaxslarning katta beparvoliklariga oid jiddiy gumonlar bor; bu esa yong‘inning juda tez tarqalishi va ko‘plab insonlarning halok bo‘lishiga olib kelgan”, - dedi.
Odatdagidan tez tarqalgan yong‘in
Gonkong xavfsizlik kotibi Kris Tang dastlabki tekshiruvlar yong‘inning tarqalish tezligi g‘ayrioddiy shaklda ekanini ko‘rsatgani va buning asosiy sababi sifatida ko‘pik izolyatsiya materiali bilan aloqali ekanini qayd etdi.
Tangning aytishicha bino devorlarini qoplagan material, shuningdek platforma atrofiga tortilgan to‘rlar va suv o‘tkazmaydigan brezentlar xavfsizlik standartlariga mos materiallarga nisbatan olovni ancha tez yoyilishiga sabab bo‘lgani aniqlangan.
Gonkong 17 yil ichida ilk bor eng yuqori, 5 - bosqichli ogohlantirish e'lon qildi.
Rasmiylar ikki qo‘shni majmua ham evakuatsiya qilingani, yong‘indan ziyon ko‘rgan taxminan 900 nafar aholi vaqtincha boshqa markazga joylashtirilganini bildirdi.
Hodisa joyiga 140 dan ortiq yong‘in - o‘chiruv texnikasi va 800 dan ziyod favqulodda xizmat hamda o‘t o‘chiruvchi xodim jalb etildi.
Transport departamenti yong‘in sababli atrofdagi yo‘llar yopilganini ma’lum qildi.
Xitoy Davlat rahbari Si Szinpin Gonkong hukumatiga halok bo‘lganlar munosabati bilan ta’ziya izhor etib, Pekindagi Gonkong va Makao ishlari idorasiga mahalliy hokimiyatlarga yordam ko‘rsatish bo‘yicha topshiriq berdi.
Gonkong Bosh ijrochi direktori Jon Li Ka - chiu ko‘plab o‘lim va jarohatlar tufayli chuqur qayg‘uda ekanini bildirar ekan, qurbonlarning oilalariga ta’ziya izhor etdi. Yaradorlarning esa tezroq sog‘ayib ketishini tiladi. Shuningdek, muammoni hal qilish choralarini muvofiqlashtirilishi uchun hukumat kabineti bilan favqulodda yig‘ilish o‘tkazdi.
