AQSh va Isroilning fevral oyida uyushtirgan qo‘shma havo hujumida halok bo‘lgan Eronning oliy diniy rahbari Oyatulloh Ali Xomanaiy uchun rasmiy dafn marosimlari boshlandi. Davlat televideniyesi minglab odamlar ishtirok etayotgan marosimlar Tehron tomonidan, avvalo, AQSh va Isroilga nisbatan kuch namoyishi sifatida tashkil etilganini ma’lum qildi.
28-fevral kuni boshlangan AQSh–Isroil–Eron urushining ilk kunida 86 yoshida suiqasd oqibatida halok bo‘lgan Xomanaiy va uning oila a’zolarini xotirlash maqsadida mamlakat bo‘ylab olti kunlik dafn marosimlari rejalashtirilgan.
Eron rasmiylari mamlakatni 35 yil boshqargan Xomanaiy bilan xayrlashish uchun faqat Tehronning o‘zida yaqin uch kun ichida 15 milliondan 20 milliongacha odam ishtirok etishini kutayotganini bildirdi.
Qasos shiorlari yangradi
Marosimlar, ayniqsa, otasining vafotidan bir hafta o‘tib oliy diniy rahbar etib e’lon qilingan, biroq hozirgacha jamoatchilik oldida ko‘rinish bermagan o‘g‘li va vorisi Mujtaba Xomanaiyning ishtiroki nuqtai nazaridan ham diqqat bilan kuzatilmoqda.
Tehrondagi Buyuk Musallo masjidi majmuasida to‘plangan minglab odamlar qasos ramzi hisoblangan qizil bayroqlarni ko‘tarib, Xomanaiyning tobuti keltirilishini kutar ekan, maydonda «Qasos!» shiorlari yangradi.
Marosimlar uch shaharda davom etadi
Xomanaiyning jasadi dushanba kunigacha Tehronda qoladi. Shundan so‘ng kuzatish marosimi o‘tkaziladi. Seshanba kuni jasad Qum shahriga olib boriladi, chorshanba kuni esa qo‘shni Iroqdagi shialar uchun muqaddas shaharlarga eltib chiqiladi. Payshanba kuni esa u tug‘ilib o‘sgan Mashhad shahrida dafn etiladi.
Marosimda xalqaro mehmonlar ham ishtirok etmoqda. Ular orasida Eron va AQSh o‘rtasidagi vositachilik jarayonida qatnashgan Pokiston Bosh vaziri Shahboz Sharif hamda Rossiya Prezidenti Vladimir Putin nomidan tashrif buyurgan Rossiya Xavfsizlik kengashi raisi o‘rinbosari Dmitriy Medvedev bor.
Shuningdek, marosimda HAMAS, Hizbulloh va Afg‘onistondagi Tolibon muvaqqat hukumati vakillari ham qatnashmoqda.
Mintaqada vaqtinchalik sulh hukm surmoqda
Besh hafta davom etgan to‘qnashuvlardan so‘ng Yaqin Sharqdagi vaziyat Pokiston vositachiligida Eron va AQSh o‘rtasida erishilgan ilk kelishuv ortidan vaqtincha tinchigan.
Biroq Eron rasmiylari zarurat tug‘ilgan taqdirda Tehron harbiy harakatlarni qayta boshlashga tayyor ekanini yana bir bor ta’kidladi.
