Kiyev Moskva bilan tinchlik muzokaralarini Britaniya va boshqa Yevropa davlatlarining talabi bilan kechiktirmoqda, deb da’vo qildi. Rossiya Prezidenti Vladimir Putinning AQShdagi maxsus vakili Dmitriyev, Vashingtonga tashrifi chog‘ida. Bu haqda TASS axborot agentligi xabar berdi.
Rossiya To‘g‘ridan-to‘g‘ri Investitsiyalar Jamg‘armasi (RTIJ) rahbari Dmitriyev jurnalistlarga “Ukraina mavjud muammolarni hal qilishga tayyor emas”ligini aytdi.
U amerikalik hamkasblariga “Ukraina, afsuski, zarur bo‘lgan muloqotni buzayotganini” yetkazishni rejalashtirayotganini bildirdi.
“Ukraina bu jarayonni Britaniya va Yevropaliklarning talabiga binoan buzmoqda — ular mojaroni davom ettirishni istaydi,” dedi Dmitriyev.
U Rossiyaga qarshi sanksiyalar haqida ham to‘xtalib, AQShning sobiq prezidenti Jo Bayden ma’muriyati bu choralarni keng qo‘llaganiga qaramay, ular Rossiyani strategik mag‘lubiyatga uchratish yoki izolyatsiya qilishga erisha olmaganini ta’kidladi.
Dmitriyev AQShning maxsus vakili Stiven Vitkoff bilan bo‘ladigan uchrashuvda Rossiyaga qarshi sanksiyalarni yumshatish masalasini ko‘tarmasligini aytdi. Uning so‘zlariga ko‘ra, hozirgi AQSh ma’muriyati Rossiyaning pozitsiyasini tushunishga qiziqish bildirmoqda, biroq Moskva–Vashington munosabatlarini normallashtirish g‘oyasi ko‘plab doiralarda qarshilikka uchramoqda.
Vakilning ta’kidlashicha, London va Yevropadagi liberal doiralar muloqotni buzish hamda Rossiyani “dushman” sifatida ko‘rsatishga faol harakat qilmoqda. Shuningdek, AQShning harbiy-sanoat kompleksi vakillari ham yaqinlashuvga qarshi chiqmoqda.
Polshaning Rossiyani havo hududini buzganlikda ayblashlariga to‘xtalar ekan, Dmitriyev Moskva bu masalani muhokama qilishga tayyorligini bildirdi.
U, shuningdek, Rossiya va AQSh bir qator masalalarda — jumladan migratsiya siyosati borasida — o‘xshash qarashlarga ega ekanini, Yevropaning migratsiya siyosatini esa “halokatli” deb atadi.
AQShda Rossiyaga nisbatan salbiy munosabatlarning keng tarqalganini tushuntirar ekan, Dmitriyev USAID tomonidan Rossiyaning xalqaro obro‘sini pasaytirish uchun sarflangan milliardlab dollarlarni misol qilib keltirdi.
Biroq u “dunyo bo‘ylab konservativ g‘oyalar inqilobi yuz bermoqda”ligini va odamlar “soxta narrativlardan charchaganini” ta’kidladi.
Dmitriyev Moskva va Vashington o‘rtasidagi muloqot yo‘qligidan jiddiy xavotir bildirar ekan, bu holat “tinchlik uchun katta xavf tug‘diradi”, dedi. Shuningdek, AQSh Prezidenti Donald Tramp harbiy keskinlik insoniyatga tahdid solishini yaxshi bilishini qayd etdi.
Vakil AQShning birinchi xonimi Melaniya Trampning Rossiya va Ukrainadan bolalarni oilalari bilan qayta birlashtirish bo‘yicha sa’y-harakatlarini maqtadi.
U, shuningdek, Ukraina Prezidenti Vladimir Zelenskiyning AQSh prezidentlik saylovida demokrat nomzodni qo‘llab-quvvatlagani va Trampga qarshi impichment jarayonidagi rolini esladi.
Rossiya–Ukraina mojarosi yuzasidan Dmitriyev Rossiyaning diplomatik yechim izlayotganini va bu yechimni oqilona muddatda topishga umid qilayotganini bildirdi. U, shuningdek, kelishuv uchun realistik kutishlar zarurligini, ammo asosiy masalalar — hududiy nizolar, Ukrainaga xavfsizlik kafolatlari va uning neytral maqomi — hal qilinsa, kelishuv tez amalga oshishi mumkinligini ta’kidladi.
“Rossiya bilan muloqot, sanksiyalar emas, kelishuvga olib keladi,” dedi u.
Ikki tomonlama munosabatlarga to‘xtalar ekan, Dmitriyev Rossiya va AQSh yangi mahbuslar almashinuvi ustida ishlayotganini bildirdi.
Alyaska va Rossiya o‘rtasida yerosti tunnelini qurish loyihasi haqida so‘ralganda, u Rossiya bu taklifni jiddiy o‘rganayotganini va uni amalga oshirish mumkin deb hisoblayotganini tasdiqladi.
Xalqaro masalalarga to‘xtalar ekan, Dmitriyev yaqinda G‘azoda o‘t ochishni to‘xtatish va tinchlik kelishuvlarini “tarixiy miqyosdagi yutuq” deb atadi, biroq ularning barqarorligi hali sinovdan o‘tishini bildirdi.
Putin va Tramp o‘rtasidagi ehtimoliy uchrashuv haqida so‘ralganda esa, u bu uchrashuv keyinroq bo‘lib o‘tishini, Budapeshtda rejalashtirilgan uchrashuv esa bekor qilinganini aytdi.
