Xitoy hukumati chorshanba kuni Everest tog‘ining sharqiy yonbag‘irlaridan 580 nafar alpinistni qutqarib oldi, deb xabar berdi davlat matbuoti.
Sinxua axborot agentligi mahalliy hokimiyat vakillariga tayanib, alpinistlar hamda 300 dan ortiq xodim — shu jumladan mahalliy gidlar, cho’pon chorvadorlari — Qudeng shahri va uning atrofidagi hududlarga eson-omon yetib kelganini ma’lum qildi.
Yakshanba kuni mahalliy ommaviy axborot vositalari Tibet va Tsinxay mintaqalarida dam olish kunlari yuz bergan to‘satdan qor bo‘roni oqibatida kamida bir alpinist halok bo‘lgani va 1000 ga yaqin odam tog‘ yo‘llarida qolib ketgani haqida xabar bergan edi.
Qor bo‘roni kirish yo‘llarini to‘sib qo‘ygan va ko‘plab chodirlarning qulashiga sabab bo‘lgan.
Shanba kuni kechqurun Dingri mintaqasida kuchli qor yog‘ib, Qudeng yaqinidagi tog‘ yo‘llari bo‘ylab sayr qilayotgan alpinistlarga jiddiy ta’sir ko‘rsatdi.
Bunga javoban, Dingri okrugi hukumati tezkor choralar ko‘rib, aloqa tizimlarini tiklash va jabrlangan hududlarda qutqaruv ishlarini olib borish uchun maxsus guruhlarni safarbar etdi.
Dingri okrugi rasmiylari yakshanba kuni ob-havo sharoiti yomonlashgani sababli bir qator sayyohlik joylari, jumladan Qomolangma (Everest) tog‘ining manzarali turizm hududi vaqtincha yopilganini e’lon qildi.
