Venesuela Prezidenti Nikolas Maduro AQSh tomonidan hujum qilinsa, mamlakati "qurolli kurash"ga tayyor ekanligini aytdi va 2,5 million askar hamda militsiya a'zolarini safarbar qilishini e'lon qildi.

"Bugun Venesuela ko'proq milliy kuchga ega, yanada birlashgan va har qanday sharoitda mustaqilligini saqlab qolish va tinchlikni qurish uchun qurolli kurashga tayyor," dedi Maduro televideniye orqali qilgan murojaatida.

U Vashingtonni harbiy mojaroni qo'zg'atishga va bosqin uchun bahona izlashda aybladi.

"Ular harbiy hodisani izlashdi. Biz provokatsiyalarga tushmadik va tushmaymiz ham," dedi u.

Maduro giyohvand moddalar savdosi haqidagi ayblovlarni o'z hukumatini ag'darish uchun bahona deb atadi.

"Hamma biladi, giyohvand moddalar va ularning savdosi haqidagi hikoya fitnadir. Bu bahona. Ular rejimni o'zgartirishni, mamlakat boyliklarini egallashni... neft zaxiralarini nazorat qilishni xohlaydi," dedi u.

U Karib dengizini "porox va raketalar" bilan to'ldirish katta mojaroga olib kelishi mumkinligini ogohlantirdi.

"AQSh va butun dunyo biladi... bu Venesuelani qo'rqitish va rejimni o'zgartirish, mamlakatni beqarorlashtirish, neftimiz, gazimiz, temirimiz va oltinimizni o'g'irlash uchun harbiy operatsiyadir," dedi Maduro.

Maduro AQSh bilan aloqalar AQSh harbiy-dengiz kuchlari joylashtirilgandan keyin buzilganini aytdi.

"AQSh hukumati bilan ikki kanalda aloqa mavjud edi, lekin ular tomonidan buzildi," dedi u.

"Bugun men e'lon qilamanki, ular tomonidan bomba tahdidlari, o'lim tahdidlari va shantajlar bilan aloqalar yo'q qilindi."

U, shuningdek, AQSh Davlat kotibi Marko Rubioni "o'lim va urush xo'jayini" deb atadi.

Uning bu so'zlari AQSh harbiylari Venesueladan narkotik tashiyotgan deb gumon qilingan kemaga zarba berib, uch kishini o'ldirgani haqidagi xabarlar tarqalishidan bir necha soat oldin yangradi. 2-sentabr kuni amalga oshirilgan avvalgi hujumda esa 11 kishi halok bo'lgandi.

Oq uy iyul oyida "Cartel de los Soles" (Quyoshlar Karteli)ni terroristik tashkilot deb e'lon qilib, uni Venesuela rasmiylari bilan bog'liq deb ayblaganidan beri keskinlik oshib bormoqda.

AQSh, shuningdek, Maduroning hibsga olinishi uchun 50 million dollar mukofot taklif qilgan va Karib dengiziga narkotiklarga qarshi operatsiyalar doirasida harbiy kemalar joylashtirgan.