Vazir Yusuf Tekin OECD tomonidan PISA 2025 natijalari e’lon qilinganidan so‘ng Slovakiya poytaxti Bratislavada jurnalistlarning savollariga javob berdi.
Turkiyaning PISA 2025 natijalarida qanday qilib “muvaffaqiyat tarixini” yaratgani haqidagi savolga javoban Tekin, 2013-yilda tayyorlov kurslarini yopish masalasi kun tartibiga kelganida, “Turkiyada ta’lim tizimi muvaffaqiyatli bo‘lishining yagona yo‘li ta’lim ustidagi vasiylik doirasini buzishdir”, deganini eslatdi.
Vazir Tekin OECDning Ta’lim va ko‘nikmalar bo‘yicha direktori Andreas Shlyayxer bilan o‘tkazilgan onlayn uchrashuvda Shlyayxer undan Turkiyaning 2015-yildan keyingi “favqulodda yuksalishi”ni boshqa davlatlarga tushuntirib berishni so‘raganini bildirdi.
Milliy ta’lim vazirligining ta’siri kuchaygach, ishlar izga tusha boshlaganini qayd etgan Tekin shunday dedi:
“Menimcha, bu muvaffaqiyat tarixining asl mohiyati shunda. Aks holda, qancha sinfxona qurmang, qancha o‘qituvchi tayinlamang, bularning hech qanday natijasi bo‘lmaydi. Chunki qilayotgan ishingizga xalaqit beradigan, uni soyada qoldiradigan boshqa bir tuzilma mavjud. Shu sababli bu yilgi ko‘rsatmamizda ham darsliklarimizdan albatta foydalanilishi va qo‘shimcha manbalar majburan tavsiya etilmasligini yozdik”.
Tekin PISA 2025 mintaqaviy yig‘ilishida so‘zga chiqqanlardan biri “o‘quvchilarga o‘zlashtira oladiganidan ortiq ma’lumot yuklasangiz, bilim yo‘qotilishiga sabab bo‘lasiz”, deganini eslatdi. Uning ta’kidlashicha, bu masala Turkiya asri maorif modeli tushuntirilayotganda ilgari surilgan asosiy mavzulardan biri bo‘lgan.
Xalqaro maydonda Turkiya ta’lim tizimiga nisbatan bildirilgan asosiy tanqidlar “o‘quv dasturingiz juda tig‘iz” va “dasturingiz hanuz bilimni ko‘nikmaga aylantirishga emas, faqat ma’lumot berishga asoslangan” degan fikrlardan iboratligini aytgan Tekin quyidagilarni bildirdi:
“Turkiya asri maorif modelida xalqaro hamjamiyatning hisobotlari va tanqidlari hisobga olinib, shunchaki ma’lumot berishga emas, balki bilimni ko‘nikmaga aylantirishga e’tibor qaratildi. Ya’ni bilimni kundalik hayot ko‘nikmasiga aylantirish imkonini beradigan o‘quv dasturini tanladik. Shu sababli keyingi PISA tadqiqotida qatnashadigan, Turkiya asri maorif modeli asosida ta’lim olgan o‘quvchilarimiz ancha muvaffaqiyatli natijalar ko‘rsatadi, deb o‘ylayman”.
