Shahzoda Andryu — Qirol Charlzning ukasi — o‘zining qirollik unvonlari, jumladan York gertsogi unvonidan voz kechganini ma’lum qildi. Bu qaror uning sharmandali jinoyatchi Jefri Epshteyn bilan aloqalari haqidagi davomli ayblovlar fonida qabul qilindi.

Juma kuni Bukingem saroyi tomonidan e’lon qilingan bayonotda Andryu, Qirol Charlz III va qirollik oilasining boshqa a’zolari bilan maslahatlashganidan so‘ng, “men haqimdagi davomiy ayblovlar Uning Oliyligi va qirollik oilasining ishlariga xalaqit bermoqda”, deb ta’kidlagan.
“Shu sababli, men o‘z unvonim va menga berilgan sharaflardan foydalanmayman,” deyiladi bayonotda.

Biroq u tug‘ilganidan beri ega bo‘lgan “shahzoda” unvonini saqlab qoladi.
Andryu shuningdek shunday dedi: “Men ilgari ham aytganimdek, menga qo‘yilgan ayblovlarni qat’iy rad etaman.”

Uning sobiq rafiqasi, York gersoginyasi Sara ham o‘z unvonidan foydalanmaydi, biroq ularning ikki qizi — malika Beatris va malika Evgeniya — o‘z unvonlarini saqlab qoladi.

Bu qaror Andryuning Epshteyn bilan aloqalari haqidagi ayblovlar hamda Xitoy josuslik ishi bilan bog‘liq taniqli shaxs bilan munosabatlariga oid yangi tafsilotlar ortidan qabul qilindi.

Xitoy bilan aloqalar

Andryu 2019-yilda Epshteyn bilan do‘stligini himoya qilgan intervyusi tufayli akasi Charlz uchun tashvish manbaiga aylangan edi.
Bundan tashqari, 2018 va 2019-yillarda Andryu Xitoyning siyosiy byurosi a’zosi Tsay Szi bilan uchrashuvlar o‘tkazgani haqida xabarlar tarqaldi. The Guardian gazetasining yozishicha, Tsay Britaniyaning ikki fuqarosi tomonidan Pekinga josuslik ma’lumotlari yetkazilganlikda gumon qilingan.

Shuningdek, Mail on Sunday gazetasi tomonidan e’lon qilingan elektron xatlar shahzodaning Epshteyn bilan aloqasi Newsnight intervyusidan keyin ham davom etganini ko‘rsatdi.

Andryu allaqachon harbiy unvonlari va xayriya tashkilotlari bilan aloqalaridan mahrum qilingan, shuningdek, “Uning Oliyligi” unvonidan foydalanish ham taqiqlangan.