Turkiya Prezidenti Rejep Tayyip Erdoʻgʻan Birlashgan Millatlar Tashkilotining Bosh assambleyasi (BMGK)dagi nutqida asosan Isroilning Gʻazoda uyushtirgan qatliomlariga e’tibor qaratgan holda falastinliklarni himoya qilish va muammo ikki davlat asosida hal qilinishi uchun tezlik bilan chora koʻrilishini talab qilmoqchi.
Prezident Erdoʻgʻan bugun Nyu - Yorkka joʻnab ketishi oldidan Istanbuldagi Ataturk aeroportida bayonot berdi va unda «BMTdagi nutqimda Gʻazodagi zulm va Turkiyaning mintaqada barqarorlikni saqlashga qaratilgan sa’y - harakatlariga toʻxtalaman», - dedi.
Birlashgan Millatlar Tashkilotining bu yilgi yigʻilishi oldingilarga qaraganda farqli boʻlishi va dunyoning bir necha davlati Falastinni tan olishini bildirgan Erdoʻgʻan, Falastin davlati qanchalik koʻp tan olingudek boʻlsa unda muammoni ikki davlat asosida hal qilish ishlari ham shunchalik tezlashishidan umidbor ekanini qayd etdi. Soʻzlari davomida Erdoʻgʻan, Shimoliy Kiprdagi Turk xalqining huquqlari va xavfsizligi ham kun tartibining bir qismi boʻlishini oʻz soʻziga ilova etdi.
Bosh assambleya paytida AQSh Prezidenti Donald Tramp bilan savdo va mudofaa sanoati sohasidagi hamkorlikni muhokama qilishini ham ma’lum qilgan Erdoʻgʻan, BMTning mavjut tuzilishi oʻz mas’uliyatini bajarish uchun yetarli emasligini qayd etishni ham unutmadi.
Prezident Erdoʻgʻan, Nyu - Yorkda shuningdek, Suriya Prezidenti Ahmed ash - Shara va Tashqi Ishlar vaziri Asad ash - Shayboniy bilan uchrashuv oʻtkazishini ma’lum qildi.
Eslatib oʻtamiz Suriya rahbariyati oʻnlab yildan beri birinchi marta BMT Xavfsizlik kengashida ishtirok etmoqda.
«Suriyalik birodarlarimiz ozodliklari uchun ogʻir kurash olib bordi. BMTning Xavfsizlik kengashi Suriya ozodligiga hissa qoʻshadi degan umiddamiz», - degan Erdoʻgʻan, «Turkiya mintaqamizning har bir qarichida tinchlik boʻlishini istaydi», - degan ifodalarga oʻrin berdi.
