Turkiya Prezidenti Rajab Toyyib Erdo‘g‘an Istanbulda NATO parlament spikerlari sharafiga uyushtirilgan tushlikda so‘zga chiqib, 7–8-iyul kunlari Anqarada o‘tadigan NATO sammiti tajriba almashish uchun eng samarali maydonga aylanishini ta’kidladi.

Erdo‘g‘an Anqara ittifoqchi davlatlar bilan nafaqat mintaqaviy inqirozlarni boshqarishdagi tajribasini, balki alyans doirasidagi ko‘p yillik salohiyatini ham o‘rtoqlashishini qayd etdi. Prezident Turkiya mudofaa xarajatlarini oshirayotganini va 2025-yildagi Xaaga sammitida olingan majburiyatlarga muvofiq, NATO missiyalari va operatsiyalariga eng ko‘p hissa qo‘shayotgan besh davlatdan biri ekanini alohida ta’kidladi.

Hozirgi murakkab vaziyatda NATOning mudofaa qobiliyatini saqlash va ittifoqchilar o‘rtasidagi birdamlikni mustahkamlash har qachongidan ham muhimligini aytgan Erdo‘g‘an, butun alyans bo‘ylab "Texasdan Anqaragacha" cho‘zilgan shartsiz xavfsizlik tarmog‘ini o‘rnatishga chaqirdi.

Rossiya–Ukraina urushiga to‘xtalib, Turkiya rahbari 2022-yildan beri davom etayotgan mojaroni muloqot orqali hal etishda yaqin kelajakda aniq natijalarga erishish zarurligini bildirdi. Shuningdek, u Falastin masalasi Yaqin Sharqdagi tarangliklarning o‘zagida turishini, Isroil bosqinchiligiga barham berilmas ekan, mintaqada barqaror tinchlikka erishish imkonsiz ekanini qayd etdi.