Rasmiylarning ma’lum qilishicha, Rossiya ukrainalik askarlarga tegishli deb topilgan 522 nafar jasadni Ukrainaga topshirdi. Bu urushayotgan tomonlar o‘rtasidagi kamyob hamkorlik misollaridan biri bo‘ldi.
Ukrainaning Urush asirlari bilan ishlash bo‘yicha muvofiqlashtiruv shtabi payshanba kuni ijtimoiy tarmoqlarda: “Qaytarish ishlari natijasida 522 nafar vafot etgan shaxsning jasadi Ukrainaga qaytarildi”, — deb yozdi. Rossiya tomoni esa ushbu jasadlar haqiqatan ham ukrainalik harbiylarga tegishli ekanini tasdiqladi.
Rossiyalik parlamentariy Shamsail Saraliyev RBC telekanaliga bergan intervyusida Rossiya javoban o‘zining 33 nafar halok bo‘lgan askari jasadini qabul qilib olganini bildirdi. Ukraina tomoni Rossiyaga jasadlarni topshirgan yoki yo‘qligi haqida rasmiy bayonot bermadi.
Minglab jasadlar qaytarildi
Ukraina Urush asirlari markazi e’lon qilgan suratlarda oq kombinezonli shaxslar yuk mashinalarini tushirayotgani aks etgan. Mazkur jarayon har ikki tomon bir-birining poytaxtiga ommaviy dron hujumlarini uyushtirayotgan keskin davrga to‘g‘ri keldi. Urushni yakunlash bo‘yicha muzokaralar esa hanuzgacha to‘xtab qolgan.
2022-yilda boshlangan keng ko‘lamli bosqindan buyon asirlar va jasadlar almashinuvi Moskva va Kiyev o‘rtasidagi yagona aloqa kanallaridan biri bo‘lib qolmoqda. Biroq tomonlar alohida hisob yuritishi va ma’lumotlar ko‘pincha turlicha bo‘lgani sababli, urush boshidan buyon o‘tkazilgan jami almashinuvlar bo‘yicha yagona statistik ma’lumot yo‘q.
Ukraina ma’lumotlariga ko‘ra, urush boshlanganidan beri 8 mingdan ortiq ukrainalik asir Rossiya qamog‘idan qaytarilgan. Odatda, mahbuslar va jasadlar almashinuvi teng miqdordagi shaxslar evaziga amalga oshiriladi, ammo bu galgi nomutanosiblik holati ochiqlanmagan. Turli manbalarga ko‘ra, mazkur mojaroda halok bo‘lganlar soni yuz minglab kishini tashkil etadi.
