Yangi Zelandiya Isroilning G‘arbiy Sohildagi harakatlari tinchlik imkoniyatini xavf ostiga qo‘yayotganidan ogohlantirdi

Yangi Zelandiya seshanba kuni ishg‘ol ostidagi G‘arbiy Sohilda vaziyat yomonlashib borayotganidan chuqur tashvish bildirdi. Mamlakat keskinlashayotgan “Isroil harakatlari” uzoq muddatli tinchlik o‘rnatish imkoniyatini xavf ostiga qo‘yayotganidan ogohlantirdi.

Tashqi ishlar vaziri Uinston Piters X ijtimoiy tarmog‘idagi bayonotida: “Isroilning harakatlarida uzoq muddatli tinchlik imkoniyatini xavf ostiga qo‘yadigan yaqqol keskinlashuv kuzatildi”, dedi.

Piters ishg‘ol ostidagi Falastin hududlarida barpo etilgan noqonuniy Isroil manzilgohlari xalqaro huquqni buzishini va ularning kengaytirilishi ikki davlatli yechim istiqboliga zarar yetkazishini ta’kidladi.

U, shuningdek, noqonuniy isroillik ko‘chmanchilarning falastinliklarga qarshi zo‘ravonligini keskin qoralab, aybdorlarni javobgarlikka tortishga chaqirdi.

Piters o‘z bayonotida: “Yangi Zelandiya Isroil hukumatini noqonuniy manzilgohlarni kengaytirishni to‘xtatish, ko‘chmanchilar zo‘ravonligining oldini olish va unga qarshi kurashish hamda tinchlik imkoniyatlarini yanada zaiflashtiradigan harakatlardan tiyilishga chaqirayotgan xalqaro hamkorlariga qo‘shiladi”, degan fikrlarni bildirdi.

Piters Vellington anneksiya qilishga qaratilgan qadamlarni yoki falastinliklarni majburan ko‘chirish xavfini tug‘diradigan harakatlarni qat’iyan rad etishini ta’kidlab, bunday choralar xalqaro huquqqa zid ekanini qayd etdi.

Yangi Zelandiya ikki davlatli yechimni qo‘llab-quvvatlashda davom etishini yana bir bor ta’kidlagan Piters, bu yechim isroilliklar va falastinliklarning tinchlik va xavfsizlik sharoitida yashashi uchun “eng katta umid” ekanini bildirdi.

Seshanba kuni bundan avval Buyuk Britaniya, Fransiya, Kanada, Daniya, Finlyandiya, Islandiya, Irlandiya, Norvegiya, Polsha, Portugaliya, Ispaniya va Shvetsiya ishg‘ol ostidagi Falastin hududlaridagi noqonuniy Isroil manzilgohlari bilan savdoni cheklashga qaratilgan choralarni e’lon qilgan edi.