Rossiya Davlat rahbari Vladimir Putin Qirg‘izistonga qilgan rasmiy tashrifi chog‘ida Moskva bilan Bishkek savdo, iqtisodiyot, ta’lim hamda migratsiya sohalarini o‘z ichiga olgan yirik kelishuvlar paketini imzolashga tayyorlanayotganini qayd etdi.
Bugun (26.11.2025) poytaxt Bishkekda Qirg‘iziston Prezidenti Sadir Japarov bilan uchrashuv o‘tkazgan Putin, ikki mamlakat o‘rtasidagi ittifoqchilik va strategik hamkorlikni yanada mustahkamlash uchun ustuvor yo‘nalishlarini belgilab beruvchi «qo‘shma siyosiy bayonot» imzolashga tayyor ekanini bildirdi.
«Uchrashuvlarimiz kun tartibi nihoyatda keng», - degan Putin, hukumatlararo hujjatlar hamkorlikni turli yo‘nalishlarda kengaytirishga xizmat qiladigan «asosiy maqsadlarni» o‘zida mujassam etganiga e’tibor qaratdi.
Putin, Rossiyaning Qirg‘iziston bilan bo‘lgan aloqalariga alohida e’tibor berishini qayd etgan holda ikki tomonlama munosabatlar «o‘zaro hurmat va manfaatlarni inobatga olish tamoyili» asosida rivojlanib borayotganini ta’kidladi.
«Men va hamkasblarim do‘st davlat Qirg‘izistonda ekanimizdan mamnunmiz», - degan Putin, uning tashrifi Kollektiv Xavfsizlik Shartnomasi Tashkilotining (KXShT) Kollektiv xavfsizlik kengashi yig‘ilishi oldidan amalga oshirilganini o‘z so‘ziga ilova etdi.
Moskva bilan Bishkek milliy valyutalar ustidan savdo qilmoqda
Putin, shuningdek, Rossiya bilan Qirg‘iziston o‘z to‘lovlarining qariyb 97 foizini milliy valyutalar orqali amalga oshirayotganini bildirdi.
Har ikki davlat «o‘zaro hisob - kitoblarni» tartibga solishning yangi variantlarini o‘rganayotganini qayd etgan Putin: «Rossiya Qirg‘izistonning yetakchi savdo - iqtisodiy hamkoridir. O‘tgan yili o‘zaro savdo hajmi 13,6 foizga oshib, 4,1 milliard dollarga yetdi va rekord natijani qayd etdi. Yanvar – sentabr oylarida esa yana 17 foizlik o‘sish kuzatildi», - dedi va Rossiya investitsiyalari qariyb 2 milliard dollarga yetganini qo‘shimcha qildi.
Sadir Japarov esa Qirg‘izistonda faoliyat yuritayotgan rus kompaniyalari soni o‘tgan yili 1 800 taga yetganini ma’lum qildi.
Putin seshanba kuni (25.11.2025) rasmiy tashrif bilan Qirg‘iziston poytaxti Bishkekka keldi. Mavzu haqida Qirg‘iziston prezidentlik apparati tomonidan bayonot berildi. Unda ikkala lider, ayniqsa, savdo va iqtisodiy aloqalarni mustahkamlash, investitsiya va sanoat hamkorligini kengaytirish; harbiy - texnik hamda madaniy - gumanitar hamkorlikni faollashtirish va mintaqaviy xavfsizlik masalalarini muhokama qilishga alohida e’tibor qaratishini bildirdi.
Putinning ushbu tashrifi Armaniston, Belarus, Qozog‘iston, Qirg‘iziston, Rossiya va Tojikistondan iborat Kollektiv Xavfsizlik Shartnomasi Tashkilotining (KXShT) 27 - noyabr kuni Bishkekda o‘tkaziladigan sammiti bilan bir vaqtga to‘g‘ri keldi.
