Ushbu noyob qo‘shma harakat ikki davlat o‘rtasidagi keskinliklarga qaramay amalga oshirildi. AQSH prezidenti Donald Tramp milliy xavfsizlikka jiddiy tahdid solayotgan Meksika narkokartellariga qarshi keskin choralar ko‘rishga va’da bergan edi.
Meksika harbiy-dengiz flotining chorshanba kungi bayonotiga ko‘ra, Kolima shtatidagi Mansanillo port shahridan taxminan 1100 kilometr uzoqlikdagi Klarion oroli yaqinida bir kemadan "jami bir necha tonna kokain bo‘lgan 188 ga yaqin paket" topilgan. Operatsiya davomida bir necha kishi qo‘lga olingan, biroq ularning aniq soni ochiqlanmagan.
Tramp Meksika hukumatiga narkotiklar savdosi va kartellarga qarshi kurashni kuchaytirish uchun bosim o‘tkazish maqsadida qo‘shimcha bojlar joriy etish bilan tahdid qilmoqda. Joriy yilda ikki qo‘shni davlat va Kanada o‘rtasidagi erkin savdo shartnomasi qayta ko‘rib chiqilishi kutilmoqda.
AQSH ma’muriyati chorshanba kuni Meksika kartellariga tegishli dronlar Texasdagi aeroportlardan birining vaqtincha yopilishiga sabab bo‘lganini bildirdi. Meksika prezidenti Klaudiya Sheinbaum esa chegara bo‘ylab kartellarga tegishli uchuvchisiz uchish qurilmalari haqida hech qanday hisobot olmaganliklarini ta’kidladi.
