Mahalliy rasmiylarning ma’lum qilishicha, juma kuni Rossiyaning Yekaterinburg shahridagi “Wildberries” logistika markazida Ukraina droni hujumidan qolgan parchalarning obyektga kelib tushishi oqibatida yong‘in yuz berdi.

Sverdlovsk viloyati gubernatori Denis Pasler Rossiya havo hujumidan mudofaa tizimlari hududda sakkizta dronni urib tushirganini, ulardan uchtasi ombor tomiga kelib urilganini ma’lum qildi. U Telegram’dagi sahifasida: “Odamlar evakuatsiya qilindi, jabrlanganlar yo‘q”, deb yozdi.

Rossiyaning eng yirik onlayn chakana savdo kompaniyasi “Wildberries” o‘t o‘chiruvchilar yong‘inni bartaraf etish bilan shug‘ullanayotganini, markaz faoliyati to‘xtatilganini va yetkazib berish ishlari boshqa logistika markazlariga yo‘naltirilganini bildirdi.

Rossiya va Ukraina dron hujumlari bo‘yicha o‘zaro da’volarni ilgari surdi

Rossiya Mudofaa vazirligi mamlakat bo‘ylab, anneksiya qilingan Qrimda va Qora dengiz ustida tun davomida Ukrainaga tegishli 203 ta dron urib tushirilganini ma’lum qildi.

Ukraina Harbiy-havo kuchlari esa Rossiya tun davomida 147 ta dron uchirganini, ulardan 114 tasi mamlakatning shimoliy, janubiy va sharqiy hududlarida urib tushirilgani yoki zararsizlantirilganini bildirdi.

Tomonlarning jang maydonidagi vaziyatga oid da’volaridan hech biri mustaqil manbalar tomonidan tasdiqlanmadi.