Islandiyada o‘tkazilgan referendum natijalariga ko‘ra, mamlakat Yevropa Ittifoqi bilan a’zolik muzokaralarini tiklashni rad etdi.

Davlat telekanali – RUV tarqatgan rasmiy ma’lumotlarga qaraganda, ovoz berganlarning 52,8 foizi jarayonni qayta boshlashga qarshi chiqqan, 47,2 foizi esa qo‘llab-quvvatlagan. Natijada, 13 yil avval to‘xtatilgan muzokaralarni jonlantirish tashabbusi barbod bo‘ldi. Bu holat Yevropa Ittifoqiga yangi badavlat a’zoni qo‘shib olishni rejalashtirgan Bryussel uchun jiddiy zarba bo‘ldi.

Aholisi 400 mingga yaqin bo‘lgan Islandiya 2009-yilgi moliyaviy inqirozdan so‘ng uyushmaga a’zo bo‘lish uchun ariza topshirgan, biroq 2013-yilda hokimiyatga kelgan euroskeptik hukumat muzokaralarni muzlatib qo‘ygandi. Bosh vazir Kristrun Frostadottir boshchiligidagi hozirgi hukumat xalqaro taranglik kuchaygan bir paytda bu masalani yana kun tartibiga olib chiqqan edi.

Referendum natijalari majburiy kuchga ega bo‘lmasa-da, hukumat uni hurmat qilishini ma’lum qildi. Tahlilchilarning fikricha, mazkur qaror kamida 2028-yilgacha Islandiyada Yevropa Ittifoqi mavzusini yopib qo‘yadi. Shuningdek, hukumat "Yo‘q" javobidan so‘ng arizani rasman qaytarib olish masalasini parlament muhokamasiga kiritishi kutilmoqda.

Asosiy qarama-qarshiliklardan biri mamlakat iqtisodiyotining ustuni bo‘lgan baliqchilik sohasi bilan bog‘liq edi. Sanoat vakillarining 90 foizi Yevropa Ittifoqiga qo‘shilishga keskin qarshi chiqqan, chunki Reykyavik bu tarmoq ustidan eksklyuziv nazoratni saqlab qolishni istaydi.

Yevropa Ittifoqi tomoni murakkab masalalarda, jumladan baliqchilik va qishloq xo‘jaligida murosaga kelishga tayyorligini bildirganiga qaramay, islandiyaliklar tanlovni mustaqillik va mavjud holat saqlab qolinishi foydasiga hal qilishdi.