G‘azo rasmiylariga ko‘ra, 10-oktabrda sulh kuchga kirganidan beri Isroil kuchlari tomonidan kamida 97 nafar falastinlik halok bo‘lgan, 230 nafari yaralangan. Yakshanba kuni esa 21 ta yangi buzilish holati qayd etilgan.
G‘azo Hukumat Axborot Idorasi bayonotida shunday deyiladi:
“Isroil bosqinchilari sulh e’lon qilinganidan beri xalqaro gumanitar huquqni ochiqdan-ochiq buzib, 80 ta hujjatlashtirilgan qonunbuzarlik sodir etdi.”
Bayonotda ta’kidlanishicha, bu qonunbuzarliklar orasida tinch aholiga qarata bevosita o‘q uzish, bombardimonlar, ataylab nishonga olish, “olov kamarlarini” yaratish va tinch fuqarolarni hibsga olish holatlari mavjud.
Rasmiy ma’lumotlarga ko‘ra, Isroil kuchlari bu hujumlarni amalga oshirishda harbiy texnika, turar-joy hududlari chekkasida joylashtirilgan tanklar, masofadan boshqariladigan nishonga olish tizimlari bilan jihozlangan elektron kranlar, samolyotlar va kvadrokopter dronlardan foydalangan.
Bayonotda yana shunday deyiladi:
“Bu qonunbuzarliklar G‘azoning barcha viloyatlarida qayd etilgan bo‘lib, bosqinchilar sulhga rioya qilmaganini va xalqimizga qarshi o‘zining qotillik hamda qo‘rqitish siyosatini davom ettirayotganini tasdiqlaydi.”
G‘azo hukumati Isroilni bu buzilishlar uchun to‘liq javobgar deb hisoblab, BMT va kelishuvning kafolatlovchi tomonlarini qonunbuzarliklarni to‘xtatish uchun zudlik bilan aralashishga chaqirdi.
Falastinlik Hamas harakati va Isroil o‘rtasidagi sulh kelishuvi AQSh Prezidenti Donald Tramp tomonidan taklif etilgan reja asosida 10-oktabrda kuchga kirgan edi.
Kelishuvga ko‘ra, Isroil kuchlari bosqichma-bosqich G‘azodan chiqib ketishi, mahbuslar almashinuvi va insonparvarlik yordamining darhol kiritilishi ko‘zda tutilgan.
Sulh ikki yil davom etgan urushni tugatishga qaratilgan bo‘lib, bu urushda 68 mingdan ortiq falastinlik halok bo‘lgan, 170 ming kishi yaralangan, hamda G‘azoning infratuzilmasining katta qismi vayron bo‘lgan.
