Xabarga ko‘ra, hujum nishonlaridan biri Eronning Lavan orolidagi neftni qayta ishlash zavodi bo‘lgan. Aprel oyining boshida amalga oshirilgan ushbu hujum katta yong‘inga sabab bo‘lib, zavod faoliyatini izdan chiqargan. Gazeta ma’lumotiga ko‘ra, bu voqea AQSh prezidenti Donald Tramp Eron bilan sulh e’lon qilishga tayyorlanayotgan paytda sodir bo‘lgan.
Eron bunga javoban BAA va Quvaytga qarata ballistik raketalar hamda uchuvchisiz apparatlar uchirgan. Manbalardan birining aytishicha, AQSh BAAning urushga qo‘shilganidan yashirin ravishda mamnun bo‘lgan.
Gazetaning yozishicha, Eron boshqa davlatlarga qaraganda eng ko‘p BAAni nishonga olgan va ushbu Fors ko‘rfazi davlatiga qarshi 2800 dan ortiq raketa va dron hujumlarini uyushtirgan.
Hujumlar BAA iqtisodiyotiga jiddiy zarar yetkazgan, ishdan bo‘shatishlar va majburiy ta’tillarga sabab bo‘lgan. Shuningdek, bu holat mamlakatning strategik qarashlarida tub o‘zgarishlarga olib kelgani ta’kidlandi.
Ismi oshkor etilmagan Fors ko‘rfazi rasmiylari gazetaga bergan bayonotida, Eron endilikda BAAning xorijiy ishchi kuchi, xavfsizlik va barqarorlikka asoslangan iqtisodiy-ijtimoiy modelini izdan chiqarishga urinayotgan “beqarorlashtiruvchi aktor” sifatida ko‘rilayotganini bildirdi.
BAA Tashqi ishlar vazirligi gazetaning izoh so‘roviga javob bermagan. Biroq Abu-Dabi avvalroq e’lon qilgan va “dushmanona harakatlarga javob qaytarish huquqi” ta’kidlangan bayonotga ishora qilgan.
Yaqin Sharq bo‘yicha tahlilchi Dina Esfandiary esa gazetaga bergan intervyusida, “Fors ko‘rfazidagi arab davlatlaridan birining Eronga to‘g‘ridan to‘g‘ri hujum qilishi muhim voqea. Endi Tehron urushni to‘xtatish uchun vositachilik qilayotgan BAA va boshqa arab davlatlari orasiga yanada ko‘proq nizo solishga harakat qiladi,” dedi.
