Turkiya Transport va infratuzilma vaziri Abdulkadir Uralo‘g‘lu seshanba kuni bergan bayonotida urush boshlanganidan buyon Turkiyaga tegishli 11 ta kema Ho‘rmuz bo‘g‘ozi orqali xavfsiz tarzda o‘tib, Fors ko‘rfazini tark etganini ma’lum qildi.
Uralo‘g‘lu Turkiyaning NSosyal ijtimoiy tarmog‘idagi sahifasida mamlakat Ho‘rmuz bo‘g‘ozi va Fors ko‘rfazi mintaqasidagi voqealarni birma - bir kuzatib borayotgani, hududdagi kemalar hamda Turkiya fuqarolari bilan doimiy aloqada ekanini bildirdi.
Uning ta’kidlashicha, 21 - iyun kuni ertalab yana ikki kema mintaqani tark etishi ortidan urush boshlanganidan buyon Ho‘rmuz bo‘g‘ozi orqali xavfsiz chiqib ketgan turk mulkidagi kemalar soni 11 taga yetgan.
Vazirning ma’lum qilishicha, mintaqada hozir ham 7 ta kema qolmoqda. Ushbu kemalarda jami 177 nafar Turkiya fuqarosi xizmat qilmoqda. Kemalardan biri Turkiya bayrog‘i ostida harakatlanayotgani ham qayd etildi.
Uralo‘g‘lu Turkiya har qanday sharoitda ham o‘z fuqarolari va kemalarining xavfsizligini ta’minlash uchun zarur barcha choralarni ko‘rishda davom etishini ta’kidladi.
Eron esa bunga javoban Isroil, Iroq va Fors ko‘rfazi mamlakatlaridagi AQShning harbiy hamda moliyaviy obyektlariga qarshi insonsiz havo transportlari va raketalar yordamida hujumlar uyushtirdi. Shuningdek, Ho‘rmuz bo‘g‘ozidagi kemalar harakatiga ham cheklovlar joriy etdi.
Ho‘rmuz bo‘g‘ozi Fors ko‘rfazini Ummon ko‘rfazi va global energiya tashish yo‘nalishlari bilan bog‘laydigan, dunyoning eng muhim dengiz o‘tish nuqtalaridan biri hisoblanadi.
