Dushanba kuni mahalliy OAV tarqatgan xabarlarga ko‘ra, «Dolphin» tayfuni mintaqaga kuchli yomg‘ir va shamollar bilan zarba berib, havo, temir yo‘l hamda dengiz transporti ishini izdan chiqardi. Buning natijasida sharqiy Xitoy bo‘ylab 1,5 milliondan ortiq odam evakuatsiya qilindi.
Venchjou shahrida taxminan 900 ming nafar aholi ko‘chirilgan bo‘lsa, Chjejiang provinsiyasining Taychjou shahrida qariyb 390 ming kishi xavfsiz joyga ko‘chirildi. Shuningdek, «China Daily» nashrining xabar berishicha, Shanxayning xavf ostidagi hududlaridan yana 215 ming nafar odam ko‘chirilgan.
Dushanba kuni Shanxayning Pudun xalqaro va Xuntszyao aeroportlarida ish faoliyati to‘xtatilishi sababli 1 000 dan ortiq reys bekor qilindi.
Yilning 13-tayfuni bo‘lgan va Xitoyga qattiq zarba bergan ushbu eng kuchli to‘fon — «Dolphin» dastlab Chjejiangdagi Yuxuan qirg‘og‘iga yopirilganda, uning maksimal shamol tezligi soatiga qariyb 150 kilometrga yetgan. Taxminan bir soat o‘tib u Venchjou yaqinida ikkinchi marta quruqlikka yuzlandi va so‘ngra zaiflashib, tropik bo‘ron darajasiga tushdi.
Suv toshqini va ko‘chkilarga oid ogohlantirishlar
Bo‘ron shimol tomon harakatlanishda davom etar ekan, boshqa qator hududlarda ham dushanba kuni kuchli yog‘ingarchiliklar kuzatildi. Hokimiyat idoralari suv toshqini va ko‘chki xavfi borligi haqida ogohlantirish e’lon qildi. Rasmiylar ma’lumotiga ko‘ra, Chjejiangning ayrim hududlariga yaqin kunlarda 250–500 millimetrgacha yomg‘ir yog‘ishi mumkin.
Shanxayda to‘rtta metro yo‘nalishi harakati to‘xtatildi, yana bir nechta yo‘nalishlarda qatnovlar cheklandi. Shuningdek, Dunxay ko‘prigi va o‘nlab suv ostida qolgan yo‘laklar yopildi.
Taychjou shahrida 3 815 ta baliq ovlash kemasi boshpana topdi, barcha 18 ta yo‘lovchi parom qatnovlari esa vaqtincha to‘xtatildi.
Rasmiylar hozircha bo‘ron oqibatida insonlarning halok bo‘lgani haqida ma’lumot bermadi. Biroq Chjejiangda 9 yoshli o‘g‘il bolani dengiz to‘lqini oqizib ketgani sababli u bedarak yo‘qolgani xabar qilindi.
