Bir deputat va mahalliy sog‘liqni saqlash mutasaddilarining ma’lumotlariga ko‘ra, Hindiston markazidagi Indaur shahrida ichimlik suvining ifloslanishi bilan bog‘liq diareya (ich ketishi) epidemiyasidan so‘ng kamida to‘qqiz kishi hayotdan ko‘z yumgan, 200 dan ortiq kishi esa shifoxonaga yotqizilgan.

Deputat Kailash Vijayvargiya Indaurda to‘qqiz kishi vafot etganini bildirdi.
Indaur shahrining bosh sog‘liqni saqlash xodimi Madhav Prasad Hasani Reuters agentligiga telefon orqali bergan bayonotida, shaharning Bhagirathpur hududidagi ichimlik suvi quvurlardagi sizib chiqish sabab ifloslangani va o‘tkazilgan suv sinovida bakteriyalar mavjudligi tasdiqlanganini aytdi.

U shuningdek shunday dedi:
“Vafot etganlar soni haqida aniq raqam ayta olmayman, biroq ha, ayni hududdan 200 dan ortiq kishi shaharning turli shifoxonalarida davolanmoqda. Zararlangan hududdan olingan suv namunasiga oid yakuniy hisobot kutilmoqda.”

Viloyat ma’muriy rahbari Shravan Verma esa shifokorlar guruhlari uyma-uy yurib tekshiruv o‘tkazayotgani va suvni tozalash uchun xlor tabletkalari tarqatilayotganini ma’lum qildi.

“Suvni ifloslantirishi mumkin bo‘lgan sizib chiqish nuqtasi aniqlandi va u ta’mirlandi”, — dedi u.

Shuningdek, rasmiylarning 8 571 kishini tekshirganini va 338 nafarida yengil alomatlar aniqlanganini qo‘shimcha qildi.