BIRLASHGAN MILLATLAR (AA) — Turkiya sobiq tashqi ishlar vaziri, hozirda Yevropada xavfsizlik va hamkorlik tashkiloti (YXHT) Bosh kotibi lavozimida faoliyat yuritayotgan elchi Feridun Sinirlio‘g‘luning Birlashgan Millatlar Tashkiloti Bosh kotibligiga nomzodi bo‘yicha rasmiy murojaatni taqdim etdi.
Turkiyaning BMTdagi doimiy vakili, elchi Ahmet Yildiz Anadolu agentligi muxbiriga bergan bayonotida nomzodni ilgari surish haqidagi tegishli maktubni BMT Bosh Assambleyasi raisiga taqdim etganliklarini bildirdi.
Elchi Yildiz: “Prezidentimiz, hurmatli Rejep Tayyip Erdo‘g‘an elchi Sinirlio‘g‘luning BMT Bosh kotibligi uchun zarur fazilatlari, qobiliyatlari, xalqaro miqyosdagi tajribasi va unga bo‘lgan ishonchini inobatga olib, uning nomzodini ilgari surishni ma’qul topdi”, — dedi.
Yildiz BMT Bosh kotibligi uchun kurashda hozirga qadar biror nomzod bo‘yicha kelishuvga erishilmagani sababli Turkiya BMTning ishini yengillashtirish maqsadida Sinirlio‘g‘luning nomzodini ilgari surganini bildirdi. Shu bilan birga, u ushbu saylovda nomzod Lotin Amerikasi va Karib havzasi mintaqasidan bo‘lishiga oid an’anani ham hurmat qilishlarini, shu sababli bugunga qadar kutganliklarini ta’kidladi.
Elchi Yildiz nomzodni ilgari surish haqidagi maktubga Sinirlio‘g‘luning tarjimayi holi hamda kelgusi faoliyatga doir qarashlari bayon etilgan hujjat ham kiritilganini qo‘shimcha qildi.
2015-yilning avgust–noyabr oylarida tashqi ishlar vaziri, 2016–2023-yillarda esa Turkiyaning BMTdagi doimiy vakili lavozimlarida ishlagan tajribali turk diplomati Feridun Sinirlio‘g‘lu hozirda YXHT Bosh kotibi sifatida faoliyat yuritmoqda.
