Eron Fransiya hukumatining o‘z hududidagi kiberhujumlar uchun Tehronni javobgar deb ko‘rsatishiga munosabat bildirib, bu ayblovlarni «asossiz va biryoqlama» deb atadi hamda ularni butunlay rad etdi.
Eron Tashqi ishlar vazirligining yozma bayonotida Fransiyaning Eronga qarshi ayblovlariga munosabat bildirildi.
«Tashqi ishlar vazirligi Fransiya hukumatining Eron Fransiyadagi go‘yoki sodir etilgan kiberfaoliyatlarga aloqador ekani haqidagi asossiz va biryoqlama ayblovlarini butunlay rad etadi hamda Eronga qarshi ayblovlar qo‘yish siyosatini keskin qoralaydi», — deyiladi bayonotda.
Fransiyaning ayblovlari «Eron obro‘siga putur yetkazish va boshqa davlatlar bilan munosabatlarini buzishga qaratilgan o‘ta mas’uliyatsiz va kulgili qadam» deb baholangan bayonotda, bu holat xalqaro huquqning «eng ashaddiy buzuvchilari bo‘lgan» AQSh va Isroilni mamnun qilayotgani ta’kidlandi.
Bayonotda Fransiya «hatto muzlatkichlar haroratini ham nazorat qila olmaydigan tizimlar» bilan bog‘liq muammolarini hal eta olmayotgani aytilib, hukumat Eronga qarshi da’volar orqali «aybni tashqi omillarga yuklab, e’tiborni boshqa tomonga burishga» urinayotgani ilgari surildi.
Fransiya rasmiylariga murojaat qilingan bayonotda ularga «boshqa davlatlarning ichki ishlariga aralashish uchun katta mablag‘ sarflash o‘rniga, resurslarini o‘z xalqining turmush va ta’lim ehtiyojlarini qondirishga yo‘naltirish» tavsiya etildi.
Yevropada supermarketlarning sovitish tizimlariga qaratilgan hujumlar
Fransiyada oktabr oyida yuzlab supermarketlarning sovitish tizimlariga qaratilgan kiberhujumlar oziq-ovqat mahsulotlarining buzilishi va moddiy zararga sabab bo‘lgan edi.
Belgiya, Lyuksemburg, Shvetsiya, Irlandiya, Niderlandiya, Finlandiya va Estoniyada ham 2-noyabr kuni ayrim do‘konlarning sovitkich va muzlatkichlarida shunga o‘xshash muammolar qayd etilgan edi. Qurilmalar harorati ko‘tarilgani sababli ayrim korxonalar oziq-ovqat mahsulotlarini sotuvdan olib tashlash va yo‘q qilishga majbur bo‘lgan edi.
Fransiya o‘z hududidagi hujumlar uchun Eronni javobgar deb ko‘rsatgan edi. Belgiyadagi voqealar yuzasidan tergov davom etayotgani, bu hodisalarni Eron yoki boshqa biror tomon bilan bog‘lashga yoxud Fransiyadagi hujumlarga aloqador deb hisoblashga asos bo‘ladigan dalillar yo‘qligi ma’lum qilindi.
