Germaniya Kansleri Fridrix Mers global tartibsizliklar fonida yevropaliklarni yanada mustaqil bo‘lishga chaqirdi. Mers dushanba kuni Frankfurt fond birjasining Eshborn shaharchasidagi Yangi yil qabulida: “Hozirda biz ehtimol siyosiy noaniqlik va beqarorlikning eng yuqori cho‘qqisini hamda chuqur burilish nuqtasini boshdan kechirmoqdamiz. Bu — o‘tmish bilan aloqalarning uzilishidir”, — deya ta’kidladi. Shuningdek, u yevropaliklar bugun “birinchi navbatda qoidalarga rioya qilish o‘rniga, kuch siyosatini yurituvchi yirik davlatlar qaytadan paydo bo‘lgan” dunyoda yashayotganini qo‘shimcha qildi.

Fridrix Mers o‘z mamlakati Yevropaning birlashishiga va shu orqali mustaqilroq bo‘lishiga yordam berishda markaziy rol o‘ynashi mumkinligini bildirdi. “Agar yevropaliklar sifatida hamjihatlikda va qat’iyat bilan harakat qilsak, dunyoda o‘zgarish yasay olamiz. Ba’zan o‘zimizga ishonganimizdan ham ko‘proq narsaga erishishimiz mumkin”, — deya tushuntirdi u.

“Suveren, erkin, tinch va iqtisodiy jihatdan gullab-yashnagan Yevropa” yo‘li ochiq ekanini ta’kidlagan Mers, Yevropa o‘zini himoya qilish qobiliyatiga ega bo‘lishi, Yevropa iqtisodiyotining raqobatbardoshligini oshirishi va texnologik jihatdan mustaqilroq bo‘lishi zarurligini uqtirdi.

Mers so‘zini davom ettirib: “Transatlantik aloqalar o‘zgardi. Biroq eski davrlarga bo‘lgan sog‘inch yoki xotiralar bizga yordam bermaydi. Ushbu global transformatsiya jarayonida o‘z o‘rnimizga ega bo‘lishni istasak, ishlarni hozir nazoratga olishimiz kerak”, — deya ogohlantirdi.