Livan Prezidenti Jozef Aun dushanba kuni Livanning janubi va sharqidagi bir qator shaharchalarni nishonga olgan, shoshilinch evakuatsiya buyruqlari berilgan Isroil hujumlarini qoraladi. Isroil seshanba kuni erta tongda Sidon shahrida uch qavatli binoga ham zarba berdi. Hujum oqibatida bir kishi jarohatlandi.
Aunning seshanba kungi bayonotiga ko‘ra, Isroil hujumlari otashkesim mexanizmi qo‘mitasi yig‘ilishi arafasida sodir bo‘lgani sababli “jiddiy savollarni kun tartibiga olib chiqdi”. Mazkur yig‘ilishda Livan janubida xavfsizlik va barqarorlikni qayta tiklash bo‘yicha aniq qadamlar, Isroil kuchlarining janubiy chegaraga chekinishi, livanlik mahbuslarni ozod etish hamda Livan armiyasining BMT Xavfsizlik Kengashining 1701-sonli rezolyutsiyasiga muvofiq joylashtirilishi kabi masalalar muhokama qilinishi kutilayotgan edi.
Livan Prezidenti shunday dedi: “Isroilning davom etayotgan hujumlari, Livanning hamkorligiga va hukumatning Litani daryosining janubida davlat hokimiyatini kengaytirish uchun ko‘rgan choralariga qaramay, taranglikni kamaytirishga qaratilgan mahalliy, mintaqaviy va xalqaro sa’y-harakatlarni izdan chiqarishni maqsad qilmoqda.”
Aun, “Livan armiyasi bu choralarni professionallik, aniqlik va intizom bilan amalga oshirdi”, dedi.
Aun Isroilning Livandagi hujumlarini to‘xtatish va mexanizm qo‘mitasining vazifasini bajarishini ta’minlash uchun xalqaro hamjamiyatni samarali aralashuvga yana bir bor chaqirdi.
Isroil OAVida, agar Livan hukumati va armiyasi Hizbullohning qurollarini yo‘q qilmasa, tashkilot pozitsiyalarini nishonga oladigan keng ko‘lamli hujumga tayyorgarlik ko‘rilayotgani haqidagi xabarlar tarqalgan edi.
Tel-Aviv G‘azodagi genotsidni davom ettirar ekan, Livan va Isroil bir yildan ortiq davom etgan chegaralararo hujumlarni to‘xtatgan 2024-yil noyabrdagi otashkesimni amalga oshirmoqda. Ikki davlat o‘rtasidagi to‘qnashuvlarda 4 mingdan ortiq kishi halok bo‘ldi, 17 ming kishi jarohatlandi.
Otashkesimga ko‘ra, Isroil armiyasi joriy yil yanvarida Livan janubidan to‘liq chiqib ketishi kerak edi. Isroil faqat qisman chekingan va besh chegara postida harbiy ishtirokini saqlab qolmoqda.
