Turkiyaning BMTdagi Maxsus vakili Ahmet Yildiz Sudanda doimiy ravishda o‘t ochishni to‘xtatish va barcha tomonlarni qamrab oluvchi siyosiy jarayon boshlashga chaqirdi. U barqarorlikni ta’minlash uchun har qanday yechim Sudan rahbariyati tomonidan olib borilishi zarurligini ta’kidladi.
Ahmet Yildiz payshanba kuni Xavfsizlik Kengashining Sudan masalasiga bag‘ishlangan yig‘ilishida so‘zga chiqib: "Turkiya Sudanda davom etayotgan to‘qnashuvlar va gumanitar vaziyatdan jiddiy xavotirda", – dedi. Anqaraning Sudanning hududiy yaxlitligini qo‘llab-quvvatlashini yana bir bor tasdiqlagan Yildiz: "Biz Sudanning birligi, suvereniteti va hududiy yaxlitligini qo‘llab-quvvatlaymiz; buni Sudan va butun mintaqa barqarorligi uchun o‘ta muhim deb hisoblaymiz", – deya qo‘shimcha qildi.
Tashqi kuchlarning to‘qnashuvlarni uzaytirishdagi roliga ishora qilib, Yildiz shunday dedi: "Sudandagi tashqi aralashuvning salbiy ta’sirini va buning to‘qnashuvlar davom etishiga, shuningdek, kengroq mintaqaga tarqalish xavfiga olib kelishini katta xavotir bilan kuzatmoqdamiz". Turkiya vakili nizoning yakunlanishida eng samarali yo‘l muloqot va diplomatiya ekanini qayd etdi.
Tinchlik muzokaralari mazmunli natija berishi kerakligini urg‘ulagan Yildiz, agar muloqot jarayoni Sudan tomonining o‘zi tomonidan boshqarilmasa, kutilgan natijaga erishib bo‘lmasligini aytdi. Xalqaro hamkorlarni keng qamrovli yechimni qo‘llab-quvvatlashga chaqirar ekan, u: "Xalqaro hamkorlarning sa’y-harakatlari doimiy o‘t ochishni to‘xtatishni, so‘ngra keng qamrovli siyosiy jarayon va hisobdorlikni ta’minlaydigan tinchlik jarayoniga aylanishi lozim", – deb qo‘shimcha qildi.
Shuningdek, Turkiyaning insonparvarlik yordami berishda davom etayotganini ta’kidlagan Yildiz, Xavfsizlik Kengashini gumanitar ahvolga ustuvor ahamiyat berishga va Sudan yetakchiligidagi muloqot harakatlariga ko‘maklashishga chaqirdi.
