DUNYO
2 daqiqa o'qish
Eron AQShni Iroq bosqini oldidagi «aldov»ni takrorlashda aybladi
Eron biologik yoki kimyoviy qurol ishlab chiqishga urinishi mumkinligi haqidagi Vashington da’volarini rad etdi.
Eron AQShni Iroq bosqini oldidagi «aldov»ni takrorlashda aybladi
Иран США / Social Media
 

Eron AQShni biologik qurol haqidagi da’volar bilan Iroq bosqini arafasidagi «aldov»ni takrorlashda aybladi.

Eron biologik yoki kimyoviy qurol ishlab chiqishga urinishi mumkinligi haqidagi Vashington da’volarini rad etdi. Tehron AQShning 2003-yilda Iroqqa bostirib kirishi arafasida ilgari surilgan da’volarni eslatib, chalg‘ituvchi bayonotlar yana takrorlanayotganidan ogohlantirdi.

Eron Tashqi ishlar vazirligi matbuot kotibi Ismoil Bag‘oyiy X ijtimoiy tarmog‘idagi bayonotida AQShning sobiq davlat kotibi Kolin Pauell 2003-yil fevralida BMT Xavfsizlik Kengashida qilgan chiqishini eslatdi. Pauell o‘sha chiqishida Bag‘dod ommaviy qirg‘in qurollariga ega ekanini isbotlashga uringan edi. Bag‘oyiy xalqaro hamjamiyatdan bu chiqishni unutish kutilayaptimi, degan savolni o‘rtaga tashladi.

Keyinchalik asossiz ekani ma’lum bo‘lgan bu da’volar o‘sha chiqishdan bir oy o‘tib AQSh boshchiligida Iroqqa bosqin boshlanishini oqlash uchun ishlatilgan edi. Bag‘oyiy jamoatchilikdan bu voqealarni unutish kutilayotganini «Nemoni izlab» multfilmidagi xotirasi zaif Dori obraziga qiyosladi.

«Yana bir bor butun dunyodan “Nemoni izlab” multfilmidagi xotirasi zaif Dori baliq kabi yoppasiga xotirasini yo‘qotish kutilmoqda», dedi Bag‘oyiy.

Uning fikricha, Iroq haqidagi da’volar bosqinni jamoatchilik orasida qo‘llab-quvvatlashga xizmat qilgan. Bosqin esa iroqliklar, butun mintaqa va oxir-oqibat AQSh jamiyati uchun halokatli oqibatlarga olib kelgan.

Tehron Iroq bosqinini oqlash uchun ishlatilgan da’volarga o‘xshash bayonotlar takrorlanayotganidan ogohlantirdi

«Endi esa yangi va dahshatli ayblovlarga duch kelyapmiz», dedi Bag‘oyiy. U bu ayblovlar o‘sha «aldov ssenariysi» asosida ilgari surilayotganini ta’kidladi.

Bag‘oyiy xalqaro hamjamiyat 2003-yilgi urush oqibatlaridan saboq chiqardimi yoki yana bir keng ko‘lamli aldovga yo‘l qo‘yadimi, degan savolni o‘rtaga tashladi.

Bag‘oyiyning bayonoti AQSh prezidenti Donald Tramp chorshanba kuni Fox News telekanaliga bergan intervyusidan so‘ng yangradi. Tramp Eronning yadroviy dasturiga qarshi uyushtirilgan hujumlardan keyin Tehron biologik yoki kimyoviy qurol ishlab chiqishga urinishi mumkinligidan darak beruvchi belgilar borligini aytgan edi.

Tramp avvalroq ham fevral oyida boshlangan AQSh va Isroil urushini oqlash uchun Erondan kelayotgan yadroviy tahdidni vaj qilib ko‘rsatgan edi.