Yevropa Ittifoqi Venesuelada lavozimiga yangi kirishgan muvaqqat Davlat rahbari Delcy Rodrigesni tan olmasligini, biroq mamlakat rasmiylari bilan cheklangan va maqsadli aloqalarni davom ettirishini ma’lum qildi.
YI Komissiyasining tashqi aloqalar bo‘yicha matbuot kotibi Anitta Hipper seshanba kuni Bryusselda bo‘lib o‘tgan kundalik matbuot anjumanida so‘zga chiqib, Ittifoqning Venesuelaga oid pozitsiyasi o‘zgarmaganini bildirib, amaldagi hokimiyat demokratik legitimlikdan mahrum ekanini ta’kidladi.
Hipperning aytishicha, Yevropa Ittifoqi Venesueladagi hozirgi boshqaruv “xalqning demokratik o‘zgarishlar yo‘lidagi irodasiga hurmat ko‘rsatmagan saylov jarayoni natijasida shakllangan” vakolat da’vosiga tayanmoqda, degan fikrda.
YIning Venesuelada demokratiyaga sodiq barcha tomonlarni qamrab oladigan inklyuziv siyosiy muloqotni qo‘llab-quvvatlashini urg‘ulagan Hipper, bu jarayon “demokratik yo‘l bilan saylangan muxolifat yetakchilarini ham o‘z ichiga olishi kerakligini” alohida ta’kidladi.
YI vakili Ittifoq na Nikolas Maduro, na Delcy Rodrigesning legitimligini tan olishini bildirar ekan, shunga qaramay, YI o‘z manfaatlari va asosiy tamoyillarini himoya qilish maqsadida Venesuela rasmiylari bilan cheklangan va texnik darajadagi aloqalarni davom ettirayotganini qayd etdi.
Bu bayonotlar Rodrigesning muvaqqat davlat rahbari etib tayinlanishidan keyin Venesuelada chuqurlashgan siyosiy inqiroz hamda AQShning Maduroga qarshi harbiy amaliyoti fonida yangradi.
AQSh armiyasi tomonidan o‘tkazilgan operatsiya doirasida Maduroning mamlakatdan olib chiqilgani, rafiqasi Silia Flores bilan birga AQShda hibsda saqlanayotgani xabar qilindi. Ma’lumotlarga ko‘ra, Maduro va Flores giyohvand moddalar kontrabandasi hamda terrorchi tashkilot sifatida ta’riflangan tuzilmalar bilan hamkorlik qilish ayblovlari asosida federal jinoyat ishlari bo‘yicha javobgarlikka tortilmoqda.
Hipper matbuot anjumanida Arktika mintaqasiga oid xavfsizlik masalalariga ham to‘xtalib, hududiy yaxlitlik va suverenitet xalqaro huquqning asosiy tamoyillari ekanini ta’kidladi.
Uning so‘zlariga ko‘ra, bu tamoyillar nafaqat Yevropa Ittifoqi, balki butun xalqaro hamjamiyat uchun majburiy hisoblanadi. Hipper, shuningdek, YIning Daniya va Grenlandiya xalqi bilan to‘liq birdamlikda ekanini bildirdi.
AQSh Prezidenti Donald Tramp Daniyaga qarashli muxtor hudud bo‘lgan Grenlandiya ustidan nazoratni qo‘lga kiritish istagini avval ham bir necha bor bildirgan va bu maqsad yo‘lida harbiy variantlarni ham istisno qilmagan edi.
Venesuelada Maduroga qarshi AQSh harbiy amaliyotidan bir kun o‘tib, Tramp yakshanba kuni bergan bayonotida AQShning xavfsizlik manfaatlarini ro‘kach qilib, Grenlandiyani Amerika nazoratiga olish chaqirig‘ini yana takrorladi.
Dushanba kuni ko‘plab Yevropa davlatlari va Yevropa Ittifoqi Daniya hamda Grenlandiyani qo‘llab-quvvatlovchi bayonotlar e’lon qilib, orol kelajagi tashqi tomonlar tomonidan belgilanishi mumkin emasligini, suverenitet va hududiy yaxlitlikka hurmat ko‘rsatilishi zarurligini ta’kidladi.
YI institutlarining Grenlandiyaga oid, olti nafar a’zo davlat yetakchisi va Buyuk Britaniya bosh vaziri tomonidan e’lon qilingan qo‘shma bayonotda ishtirok etmagani haqidagi savolga javoban Hipper, Ittifoq bunday bayonotlarga odatda darhol izoh bermasligini, biroq asosiy tamoyillarga doir pozitsiyasi aniq va o‘zgarmas ekanini aytdi.
Hipper Arktika mintaqasida barqarorlikni saqlash uchun ittifoqchilar bilan yaqin hamkorlik hayotiy ahamiyatga ega ekanini ta’kidlab, YI bilan olib borilayotgan muvofiqlashtirish mintaqaviy xavfsizlikni ta’minlashda muhim rol o‘ynashini qayd etdi.
