Saudiya Arabistoni Yamandagi iqtisodiy inqirozni yengillashtirish maqsadida Yamanning prezidentlik apparati Rahbarlik kengashi raisi Rashad al - Alimiy boshchiligidagi hukumatga qariyb 368 million dollar iqtisodiy yordam ko‘rsatishini ma’lum qildi.
Saudiya Arabistoni Tashqi Ishlar vazirligi shanba kuni Yaman Taraqqiyot va qayta tiklanish dasturi doirasida qariyb 368 million dollar yangi iqtisodiy rivojlanish yordami ajratib berishini bildirdi.
Vazirlik Yamanda yomonlashib borayotgan iqtisodiy sharoitga e’tibor qaratgan holda mazkur qarorning qirol Salmon bin Abdulazizning ko‘rsatmasi va valiahd shahzoda Muhammad bin Salmonning tavsiyasi asosida qabul qilinganini bildirdi.
Yordam al - Alimiy chaqirigʻiga javob tariqasida berilar ekan Saudiya Arabistonining Yamanning xalqaro miqyosda tan olingan hukumatini qo‘llab - quvvatlashining bir qismini tashkil etmoqda.
Ajratilgan mablag‘lar sog‘liqni saqlash, hukumat byudjeti va yoqilg‘i ta’minoti kabi asosiy sohalarga yo‘naltiriladi. Bu esa mamlakatda muhim xizmatlarni barqarorlashtirishga yordam beradi.
Yaman o‘n yildan ortiq vaqtdan beri mojarolar girdobidadir. 2014 - yilning sentabr oyidan buyon Husiylar poytaxt Sana va mamlakatning ayrim qismlarini nazorat qilib kelmoqda.
Birlashgan Millatlar Tashkiloti Yamanning 30 million nafarlik aholisi orasida 22 milliondan ortiq kishi insonparvarlik yordami va himoyaga muhtoj ekani taxmin qilinmoqda.
Toza suv, oziq - ovqat, dori - darmon va tibbiy vositalarning keng tarqalgan tanqisligi holeradan tortib boshqa yuqumli kasalliklarning ham avj olishiga yoʻl ochmoqda. Eng yomoni bu holat tinch aholi azob - uqubatini yanada kuchaytirmoqda.
