Armaniston Ozarbayjon mamlakatga yana benzin va dizel yoqilg‘isi yetkazib berishini tasdiqladi.
Ozarbayjon qo‘shni Armanistonga birinchi neft yetkazib berilganidan bir oy o‘tib, payshanba kuni ikkinchi neft mahsulotlari jo‘natilishini amalga oshiradi.
Armaniston Iqtisodiyot vazirligi matbuot kotibi Lilit Shaboyan payshanba kuni davlat axborot agentligi Armenpress savoliga javoban yetkazib berish bo‘lishini tasdiqladi, biroq qo‘shimcha tafsilot bermadi.
Chorshanba kuni Trend axborot agentligi hamda Ozarbayjon OAVlari navbatdagi jo‘natma 8-yanvar kuni amalga oshirilishini xabar qilgan edi.
Xabarlarga ko‘ra, yetkazib berish Guzdak temir yo‘l bekati va Boku yuk stansiyasi orqali amalga oshiriladi. Jo‘natiladigan mahsulotlar orasida 1 000 tonna RON 92 benzini, 1 000 tonna dizel yoqilg‘isi va 1 800 tonna RON 95 benzini bor.
Birinchi iqtisodiy bitim
Ozarbayjon mahalliy ishlab chiqarilgan neft mahsulotlarini Armanistonga ilk bor dekabr oyida yetkazib bergan edi.
Armaniston iqtisodiyot vaziri Gevorg Papoyan AQShda joylashgan ijtimoiy tarmoq Facebook’da, “Ehtimol, bu nafaqat ikki davlat o‘rtasida tinchlik o‘rnatilgandan keyin, balki umuman mustaqillikdan beri Armaniston va Ozarbayjon o‘rtasida amalga oshirilgan ilk savdo-iqtisodiy bitimdir”, deb yozgan.
Janubiy Kavkazda joylashgan ushbu ikki qo‘shni davlat 2025 yil avgust oyida AQSh prezidenti Donald Tramp ishtirokida Oq uyda o‘tkazilgan uch tomonlama sammitda o‘n yillardan beri davom etayotgan mojaroni tugatish, adovatni to‘xtatish, transport yo‘llarini qayta ochish va munosabatlarni normallashtirish bo‘yicha majburiyatlarni o‘z ichiga olgan bayonotni imzolagan edi.
