Leyen bilan Starmer Ho‘rmuz bo‘g‘ozini muhokama qildi

Ursula von der Leyen payshanba kuni (02.04.2026) bergan bayonotida, Yaqin Sharqdagi urush davom etayotgan bir paytda Ho‘rmuz bo‘g‘ozida kemalar harakati erkinligini ta’minlash uchun hamkorlar bilan birga ishlashga va’da berdi.

Von der Leyen mavzu haqida X (Twitter) dagi sahifasida shunday dedi:

“Yaqin Sharqdagi vaziyat va Ho‘rmuz bo‘g‘ozini muhokama qildik. Eronning harakatlari global iqtisodiy barqarorlikni xavf ostiga qo‘ymoqda. Kemalar harakati erkinligini imkon qadar tezroq tiklash uchun hamkorlarimiz bilan birga ishlaymiz”.

Ushbu bayonotlar von der Leyenning Buyuk Britaniya Bosh vaziri Keir Starmer bilan telefon orqali bo‘lib o‘tgan suhbati ortidan qayd etildi. Tomonlar, shuningdek, yaqinlashib kelayotgan Yevropa ittifoqi – Buyuk Britaniya sammitini ham muhokama qildi. Von der Leyen ushbu sammitni “o‘tgan yilgi majburiyatlarni bajarish va hamkorlikni yanada mustahkamlash uchun muhim imkon” - sifatida baholadi.

Inqiroz fonida:

Ho‘rmuz bo‘g‘ozidan o‘tish 28 - fevralda boshlangan AQSh – Isroil hujumlariga javob tariqasida Eronning suv yo‘lini toraytirish harakatlari sabab mart boshidan buyon amalda izdan chiqqan.

Odatda, dunyo neft ta’minotining qariyb 20 foiziga teng bo‘lgan kunlik 20 million barrel neft aynan shu bo‘g‘oz orqali o‘tadi. Bo‘g‘ozning yopilishi global neft narxlarining oshishiga, yuk tashish yo‘llari barqarorligining buzilishiga va uzoq muddatli iqtisodiy zarar xavotirlarining ortishiga olib keldi.