Xitoy Tashqi ishlar vazirligi chorshanba kuni mamlakatning Shanxay Hamkorlik Tashkiloti (SHHT) a’zo davlatlari bilan aloqalarni “chuqurlashtirish” maqsadida maxsus vakil tayinlaganini ma’lum qildi.
Tashqi ishlar vazirligi matbuot kotibi Mao Nin jurnalistlarga bergan bayonotida: “Maxsus vakillik — Xitoyning SHHT mamlakatlari bilan muloqot va hamkorlikni chuqurlashtirish uchun tashkil etilgan muhim lavozimdir”, dedi va elchi Yan Venbin SHHT ishlari bo‘yicha maxsus vakil, shu bilan birga SHHT milliy koordinatori etib tayinlanganini bildirdi.
Mao Nin, “Biz uning vazifalarini faol ravishda bajarishiga, rahbarlarning umumiy kelishuvlarini amaliyotga tatbiq etishga, tashkilotning rivojlanishi va hamkorligi yo‘lida ishlashga, mintaqaviy xavfsizlik, barqarorlik, taraqqiyot va farovonlikka qo‘shma hissa qo‘shishga hamda yanada yaqin SHHT hamjamiyatini barpo etishni rag‘batlantirish uchun boshqa SHHT a’zo davlatlarining milliy koordinatorlari bilan yaqin hamkorlik aloqalarini yo‘lga qo‘yishiga ishonamiz”, dedi.
SHHT Xitoy, Rossiya, Qozog‘iston, Qirg‘iziston va Tojikistondan iborat “Shanxay beshligi” mexanizmiga asoslangan bo‘lib, O‘zbekiston oltinchi a’zo sifatida qo‘shilgan. Keyinchalik Pokiston, Hindiston, Eron va Belarus ham tashkilot tarkibiga kirdi.
Tashkilotning 10 ta a’zo davlati bilan bir qatorda, Osiyo, Yevropa va Afrikada joylashgan 16 ta kuzatuvchi va muloqot hamkori mavjud.
SHHT dunyo quruqlik hududining taxminan 24 foizini va global aholining qariyb 42 foizini qamrab oladi. A’zo davlatlar jahon yalpi ichki mahsulotining qariyb to‘rtdan bir qismini tashkil etadi. Savdo hajmi so‘nggi yigirma yil ichida deyarli 100 baravar oshgan. Ularning jahon savdosidagi ulushi 2001 yildagi 5,4 foizdan 2020 yilda 17,5 foizga yetgan.
SHHTning 25-zirvasi Xitoy Davlat raisi Si Szinpin raisligida 2025 yil 30-avgustdan 1-sentyabrgacha Tyantszin shahrida bo‘lib o‘tdi. Sammitda 2035 yilgacha amal qiladigan 10 yillik Rivojlanish Strategiyasi, shuningdek xavfsizlik, savdo, energetika va madaniy hamkorlikka oid yakuniy hujjatlar qabul qilindi.
Xitoyning SHHT a’zolari, kuzatuvchilar va muloqot hamkorlari bilan savdosi 2024 yilda rekord darajaga chiqib, 890 milliard dollarga yetdi. Bu ko‘rsatkich mamlakatning umumiy tashqi savdosining 14,4 foizini tashkil etadi.
