Rasmiylar dushanba kuni Pokistonning shimoli-g‘arbida yuz bergan bomba portlashi oqibatida kamida olti nafar politsiya xodimi halok bo‘lganini ma’lum qildi.
Mahalliy Geo TV telekanaliga ko‘ra, masofadan turib boshqarilgan portlovchi moslama Tank tumanidagi Gomal Bozor yo‘lida zirhli politsiya mashinasi yaqinida portlatilgan.
Ichki ishlar vaziri Mohsin Naqvi hujumni keskin qoralab, halok bo‘lganlar orasida bir bo‘linma boshlig‘i ham borligini aytdi hamda qurbonlarning oila a’zolariga ta’ziya bildirdi.
Davlat radiosi Radio Pakistan xabariga ko‘ra, Bosh vazir Shahbaz Sharif hodisa yuzasidan “zudlik bilan tergov” o‘tkazishni buyurdi va aybdorlarning imkon qadar tez adolat oldida javob berishini talab qildi.
Prezident Asif Ali Zardari X ijtimoiy tarmog‘ida bergan bayonotida politsiya xodimlarining o‘ldirilganidan chuqur qayg‘u bildirgan va ularning jasoratini yuksak baholagan.
Ichki ishlar vaziri Naqvi shuningdek, Terrorizmga qarshi kurash boshqarmasi Peshawar, Bannu va Xaybar hududlarida bir qator terror rejalarining oldi olinganini, bu amaliyotlar chog‘ida sakkiz nafar “terrorchi” yo‘q qilinganini aytdi.
Naqvi: “Xaybar Paxtunxvada tinchlikni ta’minlash yo‘lida xavfsizlik kuchlarining olib borayotgan ishlarini yuqori baholaymiz”, — dedi.
