Pokiston armiyasi matbuot kotibi, general-leytenant Ahmad Sharif Chaudhry Pokiston kuchlari uzoq yillik ikki tomonlama kelishuvlar va yaqinda imzolangan Makka qo‘shma mudofaa bitimi doirasida Saudiya Arabistonidagi turli operatsion hududlarda joylashtirilganini tasdiqladi.
CNN telekanaliga bergan intervyusida Chaudhry Pokiston qurolli kuchlarining Qirollikdagi mavjudligi yangi holat emasligini, balki uzoq tarixga ega ekanini ta’kidladi. U harbiy xizmatchilar o‘n yillardan beri saudiyalik hamkasblari bilan yonma-yon uzluksiz faoliyat olib borayotganiga e’tibor qaratdi.
Chaudhry o‘zaro mudofaa ittifoqi doirasidagi qo‘shinlar joylashtirilishi haqidagi savolga javoban: “Pokiston kuchlari sifatida hozirning o‘zida u yerda [Qirollikda] ekanimizni tasdiqlay olaman. Buni siz bilan baham ko‘rishim mumkin”, dedi va quyidagilarni qayd etdi:
“Pokiston qo‘shinlari va turli harbiy salohiyat vositalari o‘n yillardan beri Saudiya Arabistonida mavjud. Avval ham aytganimdek, bu ‘Makka ittifoqi’ o‘z-o‘zidan paydo bo‘lgan tuzilma emas. Pokiston, Saudiya Arabistoni va Turkiya o‘rtasida davom etib kelayotgan diplomatik, siyosiy va harbiy munosabatlar bilan birga, xalqlar o‘rtasidagi aloqalar ham mavjud. Shunday ekan, Pokiston kuchlari turli harbiy imkoniyatlar va operatsion yo‘nalishlar doirasida hozirning o‘zida u yerda ekanini siz bilan baham ko‘rishim mumkin”.
Uch tomonlama muvofiqlashtirish
Matbuot kotibining bayonoti Pokiston, Saudiya Arabistoni va Turkiya rasmiylari xavfsizlik sohasidagi shoshilinch vaziyatlar hamda Qirollikka qarshi tahdidlarni muhokama qilish uchun 5-oktabr kuni Riyodda yig‘ilgan “Makka mudofaa ittifoqining strategik-siyosiy va mudofaa qo‘mitasi” majlisidan so‘ng yangradi.
Mazkur yig‘ilish Yamandagi Eron qo‘llab-quvvatlayotgan husiylarning Saudiya Arabistoni hududidagi fuqarolik va iqtisodiy infratuzilmaga qarshi qator uchuvchisiz uchish apparatlari hamda raketa hujumlaridan keyin o‘tkazildi.
Riyoddagi muzokaralar davomida rasmiylar Qirollik suvereniteti va hududiy yaxlitligiga qarshi hujumlarga nisbatan umumiy e’tirozlarini yana bir bor bildirdi.
O‘tgan yilning sentabr oyida imzolangan ikki tomonlama bitim doirasida Islomobod Qirollikka qo‘shimcha yordam ko‘rsatish maqsadida 8 000 askar, bir eskadrilya jangovar samolyot va havo mudofaasi batareyalarini yuborgan edi.
