Turkiya Respublikasi Prezidenti Rejep Tayyip Erdo’g’an Istanbulda bo‘lib o‘tgan uchrashuvda Bolqon davlatlarining tashqi ishlar vazirlari va yuqori darajadagi diplomatik vakillari bilan ikki tomonlama munosabatlar hamda mintaqaviy masalalarni muhokama qildi.
Prezidentlik Matbuot va kommunikatsiyalar boshqarmasi juma kuni bergan bayonotga ko‘ra, uchrashuvda Chernogoriya tashqi ishlar vaziri Ervin Ibrahimovic, Kosovo tashqi ishlar vaziri Donika Gervalla-Schvarz, Bosniya va Gertsegovina tashqi ishlar vaziri Elmedin Konakovic, Shimoliy Makedoniya tashqi ishlar vaziri Timco Mucunski, Albaniya tashqi ishlar vaziri Elisa Spiropali hamda Serbiya tashqi ishlar vaziri o‘rinbosari Nevena Jovanovic ishtirok etdi.
Prezident Erdo‘g‘on Bolqon Tinchlik Platformasining ikkinchi yig‘ilishi Istanbulda o‘tkazilganidan mamnun ekanini bildirib, ishtirokchi mamlakatlar vakillariga qo‘shgan hissalari uchun minnatdorlik izhor etdi.
Uchrashuvda chegara xavfsizligi, energetika, texnologiya va transport kabi masalalar muhokama qilingani, shuningdek mintaqaviy egalik va mas’uliyat tamoyiliga asoslangan maslahatlashuvlarning ahamiyati ta’kidlandi.
Dunyo miqyosida hamda Bolqonlarda ko‘plab sinovlar mavjudligini qayd etgan Erdo‘g‘on, Bolqon Tinchlik Platformasi a’zolari o‘rtasida hamjihatlik va o‘zaro anglashuvni kuchaytirish har qachongidan ham muhim ekanini urg‘uladi.
Bolqonlarda o‘tmish azob-uqubatlaridan saboq olib, kelajakka yo‘naltirilgan umumiy yondashuv bilan harakat qilish zarurligiga e’tibor qaratgan Erdo‘g‘on, Turkiyaning mintaqada beqarorlik oqibatlarini kamaytirish va bartaraf etishga qaratilgan sa’y-harakatlarini ham eslatdi. U, xususan Ukraina, G‘azo va Suriya boshchiligida ko‘plab hududlarda tinchlikka qaratilgan tashabbuslar davom etayotganini bildirdi.
Uchrashuvda, shuningdek, Tashqi ishlar vaziri Hakan Fidan, Prezidentlik Matbuot va kommunikatsiyalar boshqarmasi rahbari Burhanettin Duran, Prezidentning bosh maslahatchisi Akif Chagatay Kılıch va boshqa rasmiylar ham ishtirok etdi.
