Falastinning Devor va aholi punktlariga qarshi kurash komissiyasi bayonotiga ko‘ra, uch yil davomida genotsidchi Isroil askarlari tomonidan 48 ming 174 ta, isroillik bosqinchilar tomonidan esa 14 ming 742 ta hujum qayd etildi.
Mazkur hujumlar Al-Xalil — 10 ming 840 ta, Ramalloh–Al-Bira — 10 ming 594 ta, Nablus — 10 ming 261 ta va Quddusda — 7 ming 315 ta hujum bilan eng ko‘p kuzatildi.
Isroillik bosqinchilarning hujumlarida 2023-yil 7-oktabrdan buyon 66 falastinlik halok bo‘ldi.
Isroillik bosqinchilar shu davrda falastinliklarning yerlari va mulklariga ming 182 marta o‘t qo‘ydi, qariyb 100 mingi zaytun daraxti bo‘lgan jami 147 ming 111 daraxtni qo‘porib tashladi yoki shikastladi. Shuningdek, qishloqlar va badaviy jamoalarga qarshi 376 ta hujum uyushtirdi hamda chorvachilikka asoslangan 211 ta yangi noqonuniy aholi punkti tashkil etdi.
Isroil askarlari esa ming 894 tasi uy bo‘lgan jami 5 ming 59 ta bino va inshootni buzib tashladi. Quddus ming 244 ta buzish holati bilan birinchi o‘rinda qayd etildi. Bundan tashqari, 2 ming 133 ta bino bo‘yicha buzish yoki qurilishni to‘xtatish qarori chiqarildi.
Shu davrda Isroil hukumati harbiy musodara buyruqlari va “davlat yeri” deb e’lon qilish orqali falastinliklarga tegishli 64,2 ming dunam yerni musodara qildi. Bu so‘nggi 30 yildagi eng yuqori ko‘rsatkich sifatida qayd etildi.
G‘arbiy Sohil va Quddusda o‘n minglab turar joylarni qamrab oluvchi 415 ta aholi punkti rejasi tayyorlandi. Isroil hukumati Sharqiy Quddusdagi “E1” loyihasini ham o‘z ichiga olgan 15 ming 760 ta yangi turar joy qurilishi uchun 97 ta tender e’lon qildi.
Bayonotda Isroilning amaliyotlari amalda yuzaga kelgan vaziyat doirasidan chiqib, anneksiyani majburan joriy etishga qaratilgan qonunchilik tizimi tomon siljiyotgani ta’kidlandi. Xalqaro hamjamiyat aholi punktlarini kengaytirishga yo‘naltirilgan moliyalashtirishni to‘xtatish va bunga mas’ul shaxslarni javobgarlikka tortish uchun zarur choralarni ko‘rishga chaqirildi.
