Amerika Qo‘shma Shtatlari (AQSH) Prezidenti Donald Tramp, agar ittifoqchilar Eron tomonidan amalda yopib qo‘yilgan va neft tashish uchun o‘ta muhim bo‘lgan Hormuz bo‘g‘ozini ochishda yordam bermasa, NATO "juda yomon" kelajakka duch kelishini aytdi.
Yakshanba kuni "Financial Times" nashriga bergan qisqa intervyusida Tramp, AQSH Rossiya bilan urushayotgan Ukrainaga ko‘maklashayotgani kabi, yopilishi natijasida jahon bozorida energiya narxlarini ko‘tarib yuborgan Hormuz bo‘g‘ozi bo‘yicha ham Yevropadan yordam kutayotganini ta’kidladi. Yillar davomida NATO ittifoqini AQSHning saxiyligidan foydalanishda ayblab kelgan Tramp: "Agar hech qanday javob bo‘lmasa yoki javob salbiy bo‘lsa, bu NATOning kelajagi uchun juda yomon bo‘ladi deb o‘ylayman. Bo‘g‘ozdan foydalanuvchilar u yerda yomon voqealar sodir bo‘lishining oldini olish uchun yordam berishlari o‘ta o‘rinli bo‘ladi", — dedi.
Tramp qanday yordam so‘rayotgani haqidagi savolga javoban, minalarni aniqlovchi kemalar hamda "Eron qirg‘oqlari bo‘ylab joylashgan ba’zi yomon kuchlarni zararsizlantiradigan bo‘linmalar" kerakligini aytdi.
Eron bilan muzokaralar
Tramp Hormuz bo‘g‘ozi xavfsizligini ta’minlash bo‘yicha yetti davlat bilan muzokaralar olib borayotganini bildirdi. Shuningdek, u Vashington Eron bilan aloqada ekanini, biroq Tehronning to‘qnashuvni tugatish uchun jiddiy muzokaralarga tayyorligiga shubha qilayotganini aytdi. "Ular bilan gaplashyapmiz, lekin tayyor ekanliklariga ishonmayman", — dedi u.
Eronga qarshi olib borilayotgan urushning qancha davom etishi borasidagi mavhumlik neft bozorlarini larzaga keltirdi. Oxirgi ikki haftada ta’minot xatarlari tufayli xom neft narxi shiddat bilan ko‘tarildi. Yakshanba kuni AQSHning West Texas Intermediate (WTI) nefti barrel100,22 dollarga, xalqaro Brent nefti esa 106,11 dollargacha ko‘tarildi.
