Muskatin politsiyasi ma’lumotiga ko‘ra, hodisa shahardagi ikki turar joy va bir ish joyida yuz bergan. Qurbonlarning to‘rt nafari bir uyda o‘lik holda topilgan.

Dastlabki ma’lumotlarga ko‘ra, voqea oilaviy kelishmovchilik bilan bog‘liq bo‘lib, halok bo‘lganlarning barchasi 52 yoshli gumondor Rayan Uillis MakFarlandning oila a’zolari bo‘lgani taxmin qilinmoqda.

Politsiya voqea joyiga yetib kelganida gumondor uyini tark etgan bo‘lgan. Keyinchalik u shahardagi piyodalar ko‘prigi yaqinida aniqlangan. Huquq-tartibot xodimlari bilan yuzma-yuz kelgan paytda gumondor o‘ziga qarata o‘q uzib, joniga qasd qilgan.

Tergov davomida yana ikki erkakning o‘qotar qurol bilan o‘ldirilgani aniqlangan. Ularning biri alohida uyda, ikkinchisi esa yaqin atrofdagi ish joyida topilgan.

Hodisa yuzasidan tergov ishlari davom etmoqda. Politsiya bir nechta jinoyat joylarini ko‘zdan kechirmoqda va guvohlarning ko‘rsatmalarini yig‘moqda.